ლეგენდის თანახმად, ერთხელ კახელი თავადი ესტუმრა იმერელ აზნაურს. ის პერიოდია, როცა თავადებიც და აზნაურებიც, მაინცდამაინც დიდი სიმდიდრით ვერ დაიკვეხნიან (განსაკუთრებით იმერეთში). ძალიან შეწუხდა აზნაური, რა ქნას, ხორცი არ აქვს, წიწილა კი დაკლა, მაგრამ რას ეყოფა ეს წიწილა ამხელა თავადს?! არადა იცის ამ კახელების გემოთმოყვარეობის ამბავი. ეგეც არ იყოს, კახელმა როცა უმასპინძლა, სულ შამფურზე შემწვარი სუკის მწვადები აჭამა. მოაგონდა, 1 კვირის წინ სამეგრელოდან ჩამოტანილი მოზრდილი თავი სულგუნი აქვს წათხში შენახული.

      ჭამენ ამ ერთ წიწილს, ახალ ტყემალს აყოლებენ და ჭუკჭუკობენ, ღვინო კახელმა ჩამოიტანა - ჩემი ღვინო დავლიოთო და თვითონვე დაეწაფა ხარბად. ხედავს იმერელი, მაინცდამაინც კმაყოფილი არ არის სუფრით შორი გზიდან მოსული თავადი.

      - გახსოვს შენთან სუკის მწვადი რომ ვჭამეთ? - მოაგონა კახელის მასპინძლობა აზნაურმა - ახლა მე მაცადე, ისეთი მწვადი უნდა გაჭამო, ისეთი მწვადი უნდა გაჭამო, არსად, არასოდეს რომ არ გიჭამიაო. ჩემი ხელით შეგიწვავ და მოგართმევო.

      ჩავიდა აზნაური სამზარეულოში, გადაშალა ქველინარიის რეცეპტების კრებული და შეუდგა მომზადებას:

შემადგენლობა

ცომისთვის

• ფქვილი - 1 კგ.
• საფუარი - 30 გრ.
• მარილი - 1 მწიკვი.
• შაქარი - 1 ს/კ
• კვერცხი - 1ც
• წყალი - 400 მლგ
• სულგუნი

სოუსი

• არაჟანი - 1 ს/კ
• კვერცხი - 1

მომზადება:

ფენოვანი ცომი

      თასში ჩაყარეთ ფქვილი, დროში და მარილი. დაამატეთ შაქარი და ჩაახალეთ ერთი კვერცხი და დავიწყოთ ცომის მოზელვა. შეურიეთ ნელ-ნელა წყალი. ცომი უნდა გამოვიდეს არც ძალიან რბილი და არც ძალიან მაგარი.

      დაახურეთ თავსახური თასს და დატოვეთ 30-35 წუთის განმავლობში რომ ამოვიდეს. შემდეგ ჩაზილეთ თავიდან. კიდევ დაელოდეთ 20 წუთით და რომ ამოვა შემდეგ ცოტაოდენი ფქვილი შეაზილეთ და ცომი მზად იქნება.

      შამფურზე გამოსაცხობ ხაჭაპურს სჭირდება სულგუნი. მნიშვნელოვანია, რომ სულგუნი არ იყოს ახალი, არამედ ძველი და ცოტა მაგარი, რომ ცომი არ გახეთქოს და გარეთ არ გადმოვიდეს.

      მთელი თავი სულგუნიდნ ამოიღეთ იმ სისქის ზოლი, რამხელა ხაჭაპურიც გინდათ - საშუალოდ, მწვადის ხორცის საშუალო სისქის. თუ ძალიან სულგუნი, შესაძლებელია ამორჭრილი ნაწილის სიბრტყეზე გაჭრაც.

      სულგუნი წამოაგეთ შამფურზე, მნიშვნელოვანია რომ თანაბრად, შუა წერტილზე გაატაროთ შამფური სულგუნში.

      გამზადებული ცომი გააპრყტელეთ ვიწრო და გრძელ ფენად (უნდა შემოახვიოთ შამფურზე წამოცმულ სულგუნს). მნიშვნელოვანია, რომ შემოხვევისას კარგად გადაადოთ ერთმანეთზე ცომი, რომ არ დარჩეს სულ მცირე ადგილიც კი სულგუნის წვენის გამოსასვლელად.

შამფურზე შემოხვეულ ცომს წაუსვით სოუსი:

      არაჟანი და კვერცხი თასში კარგად გახსენით და ფუნჯის საშუალებით წაუსვით ცომს გარედან.

      შეწვით მაყალზე.

კახელს უკვე ძილი მორეოდა, როდესაც იმერელმა შამფურით ხაჭაპური მიიტანა სუფრასთან!