ალბათ, ქართულ გემოს ყველაზე უკეთ ნიგოზი და მისი კულინარიული სასწაულები უხდება. თუკი რაიმე ქართულია, თითქმის ყველაფერი ნიგვზიანია და ზოგჯერ, ნივრიანიც. რა მოხდება, თუკი ეს ორივე ერთ საწებელში მოთავსდება? და საწებელი კი მოხარშული დედლისთვის იქნება განკუთვნილი? ცხონებული ბებიაჩემი, ამ კახურად მოხარშული ქათმის ნიგვზიან საწებელს „სუსპენზია“-ს ეძახდა ხოლმე და ერთობ გემრიელად შეზავებულიც გამოსდიოდა.

შემადგენლობა:

• დედალი - 1 ცალი
• ნიგოზი - 300-400 გრ.
• ნიორი - 1 თავი
• მარილი - გემოვნებით

მომზადების წესი:

      კარგად გასუფთავებული ქათამი მოათავსეთ ქვაბში, დაასხით წყალი და მოხარშეთ.

      მოამზადეთ ნიგვზის საწებელი: ჩაყარეთ თასში გატარებული ნიგოზი, დანაყილი ნიორი, მოაყარეთ მარილი, დაასხით 1-2 ჭიქა ქათმის ბულიონი და კარგად ამოვურიეთ. ქათამი შეგიძლიათ ჩააწყოთ ნიგვზის წვენში ან მოასხათ უშუალოდ თქვენს ულუფას. მწვანე ხახვიც უხდება.