ყველამ ერთად ღვთის შემწეობით წარმატებულად დავასრულეთ წმინდა დავით აღმაშენებლის ტაძრის მშენებლობა. 3 ნოემბერს სრულიად საქართველოს კათალიკოს-პატრიარქმა, უწმინდესმა და უნეტარესმა ილია მეორემ აკურთხა ტაძარი და შეავედრა უფალს საქართველოს გაბრწყინება და გამთლიანება.
წმინდა მეფე დავით აღმაშენებლის ეკლესიის საძირკველი 1990 წლის ივლისში აკურთხა სრულიად საქართველოს კათალიკოს პატრიარქმა, უწმინდესმა და უნეტარესმა ილია მეორემ. თავდაპირველი ესკიზური პროექტის ავტორი იყო ცნობილი ქართველი ხუროთმოძღვარი გიგი ბათიაშვილი, მშენებლობის ინიციატორები ადგილობრივი მოსახლეობა. მაშინ ჩაიყარა ტაძრის მხოლოდ საძირკველი. სამოქალაქო ომის პერიოდში მშენებლობა შეჩერდა და განახლება დაიწყო 2000 წელს, მეუფე საბას ლოცვა-კურთხევით და უშუალო ხელმძღვანელობთ.
მშენებლობის დაწყების წინ ეკლესიის ტერიტორიაზე ადგილობრივი მრევლის შემოწირულობითა და თანადგომით გაიმართა ქვის სახერხი და საჩუქურთმო საამქრო, რომელმაც დიდი როლი შეასრულა ამ კომპლექსის ტრადიციული მეთოდით აშენებაში, მეჩუქურთმეობას დაეუფლა სხვადსხვა თაობის არაერთი ადამიანი.
ტაძარი ტეტრაკონქის ანუ ოთხაფსიდიან ცენტრალურ გუმბათოვანი ტიპისაა, რომლის ანალოგიები გვაქვს შუა საუკუნეების ტაო-კლარჯეთის არქიტექტურაში. მთავარი ხიბლი ამ ტაძრის სახისა არის ფასადების (ლილვებით, ორნამენტებით და რელიეფებით, მისი მოჩუქურთმებული კარნიზებით) შემკულობა.
ტაძრის სიმბოლურ-არქიტექტურული გვირგვინია მისი სახურავი ბაზალტის ქვის ლორფინი და ქვის ჯვარი.