დაფინანსებული კვლევა არ ათავისუფლებს მკვლევარს ეთიკური ქცევისგან. მაგალითად, შეიძლება არაეთიკური იყოს სპონსორისთვის, რომ მკვლევარს მიუთითოს:

• როგორ ჩაატაროს კვლევა;
• რა შედეგებს უნდა მიაქციოს ყურადღება და
• რა - დაფაროს;
• რა შევიდეს ანგარიშში და რა - არა;
• დაფაროს სპონსორის ვინაობა;
• რა მიზნებს ემსახურება კვლევა.

      მეორე მხრივ, სპონსორებს აქვთ უფლება, შეინარჩუნონ კონფიდენციალობა. მათ შეიძლება ჰქონდეთ უფლება, არ განაცხადონ საჯაროდ თავიანთი ვინაობის, კვლევის მიზნებისა და შედეგების შესახებ.

      დაფინანსებული კვლევა, ჩვეულებრივ, მოლაპარაკების საგანია მკვლევარსა და სპონსორსა და მკვლევარსა და მონაწილეებს შორის, მაგრამ, იმის მიუხედავად, რომ კვლევა შეიძლება მხოლოდ სპონსორისთვის იყოს განკუთვნილი და არა - ფართო საზოგადოებისთვის, ეს არავის აძლევს უფლებას, უკარნახოს მკვლევარს, როგორ ჩაატაროს კვლევა და რა შედეგები მიიღოს; ერთი სიტყვით, არავის არ აქვს კვლევის დაკვეთის უფლება.

      ცხადია, მკვლევრის პასუხისმგებლობებში მხოლოდ კვლევის ჩატარება და სპონსორისთვის ანგარიშის წარდგენა შედის. ამის შემდეგ რა ბედი ეწევა ანგარიშს (მაგალითად, სრულად გამოქვეყნდება თუ არა, ხელმისაწვდომი იქნება მთელი საზოგადოებისთვის, თუ მხოლოდ მისი გარკვეული ნაწილისთვის სპონსორის ორგანიზაციაში), ეს სპონსორის გადასაწყვეტია. თუმცა, ეს არ ათავისუფლებს მკვლევარს კვლევის შესახებ გადაწყვეტილებების მიღებისგან და მან უნდა შეინარჩუნოს კვლევის იმგვარად ჩატარების უფლება, როგორც მან იცის და როგორც თავად მიაჩნია საჭიროდ და არა ისე - როგორც გადაწყვიტა სპონსორმა. მკვლევრის ხელშეუხებლობა აბსოლუტური უნდა იყოს. ხშირად ხდება, რომ მკვლევრები წინასწარ ათანხმებენ სპონსორთან პუბლიკაციის უფლებას და იმასაც, რა სახის კონფიდენციალობა უნდა დაიცვას მკვლევარმა.

      სპონსორს უფლება აქვს, ელოდოს მაღალ ხარისხს, ზუსტ და სასარგებლო კვლევას. მკვლევარი არ უნდა დაექვემდებაროს ზეწოლას და

• არ უნდა დაარღვიოს რესპონდენტების კონფიდენციალობა;
• გარკვეული ამოცანის შესრულების მიზნით, სასურველი მიმართულებით არ უნდა წარმართოს მონაცემები, მათი ანალიზი და წარდგენა;
• არ უნდა წარადგინოს შერჩეული და არარეპრეზენტაციული მონაცემები და დასკვნები;
• არ უნდა გამოიყენოს მონაცემები შეუთანხმებელი პირადი ინტერესებისთვის, გეგმებისთვის, მიზნებისა და წინსვლისთვის.
• არ უნდა ჩაატაროს კვლევა, რომელშიც პირადი ინტერესი გავლენას მოახდენს კვლევის ხასიათზე, შინაარსსა და პროცესზე.

      მკვლევარს აქვს ვალდებულებები სპონსორის წინაშე, მაგრამ არა - კვლევის ჩასწორებისა და კომპრომეტირების ვალდებულება.