წმიდა ონისიმე სამოცდაათაგანნი, ფრიგიის ქალაქ კოლასეში ცხოვრობდა. შეძლებული ქრისტიანის, ფილიმონის მონა გახლდათ. ერთხელ მან რაღაც ცოდვა ჩაიდინა ბატონის წინაშე, შემდეგ კი სასჯელს გაექცა და რომს შეაფარა თავი . აქ გაქცეული მონა დააპატიმრეს და საპყრობილეში ჩასვეს. საპყრობილეში ონისიმეს დახვდა ბორკილებ დადებული პავლე მოციქული, რომელმაც სახარების სიტყვა შეასწავლა, შემდეგ კი მონათლა. და ახალნათელღებული შვილივით ემსახურებოდა შეპყრობილ წმიდანს. პავლემ, რომელიც პირადად იცნობდა ფილიმონს, ონისიმეს წერილი გაატანა მასთან და სიყვარულით სთხოვა, შეეწყალებინა შეცოდებული მონა და ძმასავით მიეღო იგი. ფილიმონმა (ხს. 4 იანვარს, 19 თებერვალს და 22 ნოემბერს) ამ წერილის პასუხად არა მარტო შეუნდო მომავალ წმიდანს, არამედ გაანთავისუფლა კიდეც იგი და უკანვე, რომში გაგზავნა მოციქულთა თავთან. აქ ონისიმე ეპისკოპოსად იქნა ხელდასმული. პეტრე და პავლე მოციქულების სიკვდილის შემდეგ მან სახარების ქადაგებით მოიარა ესპანეთი და აზია. ღრმა მოხუცებულობაში წმიდანი ტიმოთეს შეენაცვლა ეფესოს სამღვდელმთავრო კათედრაზე. როცა ეგნატე ღმერთშემოსილი რომში სიკვდილით დასასჯელად მიჰყავდათ, გზაზე მას ნეტარი ონისიმე გამოეგება რამდენიმე ქრისტიანთან ერთად, რასაც თავად ეგნატე ახსენებს ეფესელთა მიმართ ეპისტოლეში.

     იმპერატორ ტრაიანეს მეფობის დროს ონისიმე შეიპყრეს და სამსჯავროზე წარადგინეს. ქრისტეს მხნე აღსარებისათვის იგი ჯერ საპყრობილეში გამოკეტეს, შემდეგ კი ქვებით თავი მოჰკვეთეს. ერთმა დიდგვაროვანმა და კეთილმსახურმა ქალმა მოწამეობრივად აღსრულებული მოციქულის წმიდა ცხედარი ვერცხლის ლუსკუმაში ჩაასვენა. ეს მოხდა დაახლოებით 109 წელს.

◄ გუშინ | დღეს | ხვალ ►