დღე ერთი იყო და იმ დღიდან მოყოლებული ადამიანი და ცხენი ერთ მთლიან ორგანიზმად იქცა და ამ ორგანიზმს მხედარი ერქვა. ამხედრებაც და ამაღლებაც ხომ ამ ფაქტს უკავშირდება. მაგრამ ჩემი დღევანდელი ბლოგი არა მხედრებს, არამედ ცხენებს ემსახურება. და არა მეომარი ცხენები უნდა წარმოგიდგინოთ, არამედ მოდელი ცხენები, ან იქნებ ტოპ-მოდელი, ფოტო-მოდელი ცხენები უფრო მართებული იყოს.

      ბრაზილიურ-კოლუმბიურ სერიალებზე აღზრდილებს, კარგად ემახსოვრებათ ცხენებისადმი ტრფობა. რანჩოები, მოვლა-პატრონობა, თვალის ჩინივით მოფრთხილება, ქურდობაზე სისხლის აღება, დოღის ხიბლი და ესთეტიკა. მოკლედ, დღიდან დამეგობრებისა, ცხენი აქტიური პატივისცემის მიზეზი გახდა. ცხენოსანი მანქანები, ცხენს ამოფარებული ბრენდები, ცხენში დამალული მეომრები, პროზა-პოეზია-სიმღერა ეძღვნებოდა ცხენებს და აგერ, რამდენიმე კვირის წინ, ერთმა ფოტოგრაფმა და ცხენმოყვარე ქალბტონმა იკითხა - და რატომ არა ცხენები ვარცხნილობაშიც-ო?

      დიახ, არ მოგესამათ. ცხენებზე გადაღებულია ფილმები, შექმნილია ანიმაციები და მულტიპლიკაციები, მათი ფოტოები მსოფლიოს ყველა კუთხეში მოიპოვება და მოდი, ფაფარაშლილი ცხენების ფოტოსესია შევქმნათ. - ასეთი იყო საფუძველი იმ ალბომისა, რომელიც უნდა წარმოგიდგინოთ.

      ავტორი: ვიბკ ჰაასი (Wiebke Haas). ის, 2011 წლიდან იღებს და აპოზიორებს ცხენებს, მაგრამ ახლა რაღაც ახალი უნდოდა, რამე ჰოლივუდურ-ვარსკვლავური, „ფეშენური“. აი ისეთი, ვიქტორია სეკრეტის გოგოები რომ იღებენ ხოლმე, ოღონდ ამჯერად, ვიქტორია სეკრეტის ცხენები უფრო მიესადაგება.