ახალი წლის დღეებისთვის დედაქალაქიც იწყებს მზადებას და ხელისუფლებაც ცდილობს მოასწროს საქმეები - ამტკიცებენ ბიუჯეტს და კანონპროექტებს, ასევე მთავრობის ოპტიმიზაციას აგვარებენ. სააკაშვილი ორ ქვეყანაში სამართლებრივ ბრძოლაშია, მაგრამ მაინც მერობაზე უჭირავს თვალი. საზ.მაუს პირადი ბიზნესის ქონა-არ ქონას უპრობლემებენ, ისლამური სახელმწიფო ამერიკას ემუქრება, ამერიკა კიდევ, ჩვენთვნს მოყიდულ ჯეველინებს უკან იბრუნებს!

საქართველოს და მსოფლიოს ამბები / 14 დეკემბერი, 2017/

      ბიუჯეტი, პარლამენტი, კონსტიტუცია და მთავრობა - პარლამენტმა 113-ხმით, მომავალი წლის სამხედრო ძალების რაოდენობის შესახებ დადგენილება დაამტკიცა. ირაკლი ნადირაძე - თუ „ქართული ოცნების“ წარმომადგენლები გვეუბნებიან, რომ შრომის ანაზღაურება 5 მლნ ლარით შეამცირეს, 15 მილიონით გაიზარდა ბიუროკრატია. გია ვოლსკი - საკონსტიტუციო ცვლილებებთან მიმართებაში ოპონენტების მხრიდან კრიტიკის ვერანაირ საფუძველს ვერ ვხედავ. სერგო რატიანი - ამ კონსტიტუციის მიმართ პრეტენზია აქვს ყველას: ოპოზიციას, არასამთავრობო ორგანიზაციებს და საზოგადოებას. პარლამენტმა პირველი მოსმენით კონსტიტუციის ახალ რედაქციაში შესატანი ცვლილებების პროექტი მიიღო. მამუკა მდინარაძე - ჩვენ დღეს მხარი დავუჭირეთ პოზიტიურ კონსტიტუციას.

      დედაქალაქის ამბები - დავით უთმელიძე - 2018 წლის თბილისის ბიუჯეტის პროექტი მორგებულია თბილისელებზე, ჩვენი გუნდის წინაასაარჩევნო დაპირებებზე. ირაკლი ბენდელიანი - თბილისის მერის ხუთი მოადგილის შტატი არსებობს, თუმცა დღეისთვის კახა კალაძე სამი მოადგილით არის წარმოდგენილი. საკრებულოში თბილისის 2018 წლის ბიუჯეტის პროექტის კულტურულ და გარემოსდაცვით პრიორიტეტებზე იმსჯელეს. კახა კალაძის განცხადებით, არსებობენ ჯგუფები, რომლებსაც თბილისში სოციალურად დაუცველი ადამიანები ჩამოჰყავთ და უკანონოდ მითვისებულ მიწებზე შენობებს აშენებენ.

      განათლება მომავალ თაობაში - განათლების სამინისტრომ ქუთაისში მოსწავლის ცემის ფაქტის შესწავლა დაიწყო.

      უცნობის საქმე - კონკურენციის სააგენტო გია გაჩეჩილაძის საჩივარზე მოკვლევის დაწყების ან უარის თქმის თაობაზე გადაწყვეტილებას 30 დღის ვადაში მიიღებს. გია გაჩეჩილაძის სიძემ, კომპანია "სიტროენ ჯორჯიას" გენერალურმა დირექტორმა, პრემიერ-მინისტრის სახელზე განცხადება შეიტანა. სიტროენ ჯორჯიას" გენერალური დირექტორი - როდესაც პრემიერი ამბობს, მე გადავდგები თუ ეს დადასტურდა, ეს არის წნეხი ყველა იმ ორგანოზე, რომელმაც საქმე უნდა გამოიძიოს.

      სააკაშვილი და საქართველო - საქართველოს ყოფილ პრეზიდენტ მიხეილ სააკაშვილს სახაზინო ადვოკატი დაენიშნა. მას სოფიო გოგლიჩიძე დაიცავს. სახაზინო ადვოკატი - მიხეილ სააკაშვილთან დაკავშირებას შევეცდები. „ნაციონალურმა მოძრაობამ” მიხეილ სააკაშვილის წინააღმდეგ პოლიტიკური დევნის შეწყვეტის მოთხოვნით ხელმოწერების შეგროვება დაიწყო. პროკურორი - სააკაშვილის ახალი ადვოკატი უნდა გაეცნოს 22 ჩვენებას და 2 საათიან სიუჟეტებს, რისთვისაც ერთ კვირიანი ვადა საკმარისია. მიხეილ სააკაშვილის პოლიტიკური დევნის შეწყვეტის მოთხოვნით ხელმოწერების შეგროვება თბილისის გარდა სხვა დიდ ქალაქებშიც მოხდება. ნიკა მელია - არის კონკრეტული დავალება, რომ მიხეილ სააკაშვილს წლის ბოლომდე გამამტყუნებელი განაჩენი გამოუტანონ და ამით დაეხმარონ პეტრო პოროშენკოს. ადვოკატი - მიხეილ სააკაშვილი ვალდებული არაა დაკითხვაზე გამოცხადდეს.

      ჭრელო პეპელას ეფექტი? - „რესპუბლიკელი“ სენატორი რენდ პოლი საქართველოსთვის Javelin-ების მიყიდვის დაბლოკვას ითხოვს. ლევან იზორია - სენატორებისა და კონგრესმენების უმრავლესობის განწყობაა, მხარი დაუჭიროს Javelin-ების საქართველოსთვის მიყიდვის გადაწყვეტილებას. ლევან იზორია - Javelin-ი არ არის მიმართული არც ერთი ქვეყნის წინააღმდეგ და მისი ერთადერთი მიზანი ჩვენი ქვეყნის სუვერენიტეტის დაცვაა.

      მკვლევარი საია - საია-ს კვლევის თანახმად, 2012 წლიდან საჯარო მოსამსახურეების მიერ სამინისტროებისა და თვითმმართველი ქალაქების წინააღმდეგ 382 სარჩელია შეტანილი. კვლევის თანახმად, საჯარო მოხელეების გათავისუფლებისთვის სამინისტროების მიერ გადახდილი თანხა 373 038 ლარს შეადგენს. საია - საჯარო მოხელეების გათავისუფლების თაობაზე 153 შემთხვევაში სასამართლო დავა დასრულებულია, 161 შემთხვევაში დავა გრძელდება.

      ტელევიზია - რომან კაკულიას განმარტებით, საზოგადოებრივი მაუწყებლისთვის კომერციული რეკლამის განთავსების შესაძლებლობის მინიჭება სამართლიანი მიდგომა არ არის. ლევან კობერიძე - საზოგადოებრივი მაუწყებლისთვის კომერციული რეკლამის უფლების დამატება სხვა მედიასაშუალებებს სარეკლამო ბაზრის გარკვეულ ნაწილს წაართმევს. დავით ჭიჭინაძე - გაუგებარია, რატომ უნდა ჰქონდეს კომერციული რეკლამის განთავსების უფლება საზოგადოებრივ მაუწყებელს. მამუკა მდინარაძე - “მაუწყებლობის შესახებ“ კანონში ცვლილებებზე აზრთა სხვადასხვაობა სწორი გადაწყვეტილების მიღების წინაპირობაა. რომან გოცირიძე - „საზოგადოებრივ მაუწყებელს“ ელემენტარული რეიტინგი ხომ მაინც უნდა ჰქონდეს? წელს 2%-მდე დავიდა რეიტინგი და გაუთანაბრდა ”მარაოს” რეიტინგს. ეკა ბესელია - ჩვენ უნდა დავეხმაროთ საზოგადოებრივ მაუწყებელს, რომელსაც ბიუჯეტიდან აქვს დაფინანსება, რომ ის ამართლდებდეს იმ მიზანს, რისთვისაც არსებობს. „მაუწყებლობის შესახებ“ კანონში დაგეგმილი ცვლილებები მეორე მოსმენით დაამტკიცეს.

საზღვარგარეთულები:

      ბიბლიური ქალაქი, მშვიდობის ქალაქი - ილჰამ ალიევი დონალდ ტრამპს იერუსალიმთან დაკავშირებული გადაწყვეტილების გადახედვისკენ მოუწოდებს. “ისლამური თანამშრომლობის ორგანიზაციამ“ აღმოსავლეთ იერუსალიმი პალესტინის დედაქალაქად აღიარა. ”ისლამური სახელმწიფო” ისრაელის დედაქალაქად იერუსალიმის აღიარების გამო აშშ-ს ემუქრება.

      სააკაშვილი და უკრაინა - იური ლუცენკო - მიხეილ სააკაშვილს არა კურჩენკოს ფულით სახელმწიფო გადატრიალების ორგანიზებაში, არამედ ამის ხელშეწყობაში ვადანაშაულებთ. უკრაინელი პოლიტოლოგი - სააკაშვილი ახლა ისევე მოქმედებს, როგორც ლენინი 1917 წელს. მიხეილ სააკაშვილი - იცით, რაზე ვოცნებობ? ოდესის მერობაზე. მიხეილ სააკაშვილი - „ისინი“ მეუბნებიან - გიყიდით ბილეთს ნიდერლანდებში ან ერთწლიან საგზურს მალდივებზე, ოღონდ თავი დაგვანებე. მიხეილ სააკაშვილი - ვერა და ვერ დამივიწყა პუტინმა! მიხეილ სააკაშვილი - პუტინს ჩემი ისე ეშინია, როგორც ეშმაკს - ნაკურთხი ჯვრის.

      რუსეთი და უკონკურენტო პრეზიდენტი - დიმიტრი პესკოვი - პრეზიდენტობის ბევრ კანდიდატს ვხედავთ, მაგრამ ვერ ვხედავთ ვლადიმერ პუტინის კონკურენტებს.

      პუტინთან ინტერვიუდან - ვლადიმერ პუტინი - ტრამპის გარემოცვასთან რუსების კავშირების შესახებ ინფორმაცია ტრამპის ოპონენტებმა გამოიგონეს. ვლადიმერ პუტინი - რასაც სააკაშვილი აკეთებს, უკრაინელი და ქართველი ხალხისთვის სახეში შეფურთხებაა - ისეთი საცოდავი სანახავია, რომ გული მისკდება. ვლადიმერ პუტინი - თუ ოპოზიცია ხელისუფლებაში მოვა, რუსეთში „მაიდნები“ მოხდება, ქუჩებში კი „სააკაშვილები“ ირბენენ.

      იემენის დედაქალაქზე საჰაერო თავდასხმას 35 ადამიანი ემსხვერპლა, 80 კი დაშავდა.

      სომალიში პოლიციის აკადემიაზე თვითმკვლელი ტერორისტის თავდასხმის შედეგად 5 ადამიანი დაიღუპა.