როგორც წესი, ჩემი ბლოგი, ხელოვანებს, შემოქმედებს და მისთანათ ეძღვნება ხოლმე (რა თქმა უნდა, გამონაკლისი პოსტებიც არსებობს). დღეს არ დავარღვევ ამ ტრადიციას და ამჯერად უზენაეს შემოქმედს და მის ერთ-ერთ ქმნილებას წარმოგიდგენთ.

      თეთრი, ფითქინა მტრედები ხომ თავისთავად სილამაზე, სისადავე, სისუფთავე და მშვენიერებაა, მაგრამ სამეფო ტიტულატურით, მაინც სხვა მტრედი სარგებლობს. მას უბრალოდ ბუნებრივად აქვს გვირგვინი, ყოველგვარი ბაგრატიონობის, რომანოვობის, ბურბონობის ვალუობის და მისთანათა გარეშე.

      შეფერილობა ლურჯი, ცისფერი, სამეფო ფერის (მედეასავით, ცისფერსისხლიანი). მტრედთა სახეობის ნუსხაში Victoria crowned pigeon (Goura victoria) ჰქვია - სამწუხარდ ქართულად თარგმნილი არ არის, ამიტომ შეგვიძლია სამეფო გვირგვინის მტრედი ვუწოდოთ, ან მტრედი ვიქტორია, გვირგვინიანი მტრედი ანდა, სულაც ოფოფი მტრედი. ცხადია, ამ მტრედსაც, ინგლისის ცნობილი დედოფლის ვიქტორიას სახელი ერგო მეცხრამეტე საუკუნეში, მაგრამ წარმოშობით ვესმისტერიდან სულაც არ არის, ინდონეზიელია - გავრცელებულია ახალ გვინეაში.