ვიდრე ხევები წყლით აივსება იქამდე მაღაზიები გაიხსნა და ფრენებიც აღდგა. მართალია, არავინ იცის ეს ფრენები ჯერ რას მოგვცემს - მაგრამ აღდგა. რაიონებში განახლდა სასწავლო პროესიც სკოლებში და მოსწავლეები მერხებს დაუბრუნდნენ. ოპოზიცია ისევ შესვლაზე ბჭობს, გარეჯის საქმე ისევ ხმაურიანია და მთავარ ფიგურანტს, მელაშვილს, შეურაცხყოფასაც კი აყენებენ მაღაზიაში. დღის ცუდი ამბავი - თემურ წიკლაური გარდაიცვალა. რაც შეეხება კორონავირუსს - დადასტურებული შემთხვევა - 258351, გუშინ დილის შემდეგ - 240; გამოჯანმრთელებული - 249709, გუშინ დილის შემდეგ - 681; გარდაცვლილი - 3194, გუშინ დილის შემდეგ - 16; კარანტინის რეჟიმში - 474. დოლარის ფასი ლარში - 3.3026.

საქართველოს და მსოფლიოს ამბები | 1 თებერვალი, 2021

      #კოვიდსაქართველო - საქართველოში კორონავირუსით ინფიცირების 240 ახალი შემთხვევა გამოვლინდა, ქვეყანაში ბოლო 24 საათში 9 056 ტესტი ჩატარდა. 16 ადამიანი გარდაიცვალა. პოლიციამ კოვიდ-19-ის წინააღმდეგ ბრძოლის მიზნით მოქმედი რეგულაციების დარღვევის 779 ფაქტი გამოავლინა. ეკატერინე ტიკარაძე - ADB-ს ხელშეწყობით სამინისტრომ შეძლო განევითარებინა გეგმა, რომელიც დაგვეხმარება წლის ბოლომდე 1.7 მლნ მოქალაქის ვაქცინაციით უზრუნველსაყოფად. გიორგი გახარია - საქართველო იქნება პირველი 18 ქვეყნის სიაში, რომლებიც უახლოეს პერიოდში მიიღებენ „ფაიზერის“ ვაქცინას. პაატა იმნაძე - სიტუაცია სტაბილურობისკენ მიდის და მთავარია, ხიბლში არ ჩავვარდეთ - კორონავირუსს ძალიან ცოტა დრო სჭირდება, რომ შემთხვევების რიცხვი გაოთხმაგდეს. პაატა იმნაძე - კომენდანტის საათი, ალბათ, ყველაზე ბოლოს მოიხსნება. ნათია თურნავა - ყურადღებით დავაკვირდებით პროცესს, როგორ ჩაივლის ბიზნესაქტივობების გახსნის პირველი პერიოდი, რაზეც დამოკიდებულია შემდგომი გახსნის გეგმა. გიორგი გახარია - ყველაფერს გავაკეთებთ იმისთვის, რომ ბალანსის დაცვით, ადამიანის სიცოცხლესა და ჯანმრთელობას გავუფრთხილდეთ, მაგრამ ეკონომიკაც ნელ-ნელა გავხსნათ. გიორგი გახარია - არავინ არ არის დღეს ისე დაინტერესებული შეზღუდვების სწრაფი მოხსნით, როგორც მთავრობა და პირადად მე.

      მანდატების გადანაწილება - დავით სერგეენკო ოპოზიციონერი დეპუტატებისთვის უფლებამოსილების შეწყვეტაზე - იმის მოლოდინი ნამდვილად არ არის, რომ ამ ტექნიკურ საკითხში ყველა ერთიანი იქნება. სერგეენკო "ქართულ ოცნებასა" და „მოქალაქეებს“ შორის გაფორმებულ მემორანდუმს წინგადადგმულ ნაბიჯად აფასებს. ანრი ოხანაშვილი ოპოზიციის წევრებისთვის უფლებამოსილების შეწყვეტაზე - პრაქტიკულად, მათ უწევთ უკან დახევა და გარკვეული პოზიციების გადასინჯვა. სერგო ჩიხლაძე - ელისაშვილს მემორანდუმი ან პოლიტიკური გამოუცდელობის გამო შეაჩეჩეს, ან ამას მიზანმიმართულად აკეთებს, რომ მეტი კომფორტი შეუქმნას „ქართულ ოცნებას“. გრიგოლ გეგელია - ერთპარტიულ პარლამენტში 1 ალეკო იჯდება, 3 თუ 7 ალეკო, მან თავისი თავი სრულად ამოწურა - როგორც ჩანს, მოსახლეობის 52%-ის მიერ არჩეული აბსოლუტური უმრავლესობა იქნება გარეთ. შალვა პაპუაშვილი - „გირჩის“ განცხადებიდან ვიცით, რომ ოპონენტებში არის ჯგუფი თუ ჯგუფები, რომლებიც ეწინააღმდეგებიან მოლაპარაკებების პროცესს. დავით მათიკაშვილი - „გირჩის“ სულისკვეთება მესმის, რადგან საპარლამენტო რესურსი ყველა პოლიტიკური ჯგუფის მიერ მაქსიმალურად გამოყენებული უნდა იყოს. აკაკი ბობოხიძე - ხელისუფლებისაგან, რომელმაც მიიტაცა ძალაუფლება, ველოდები, რომ ასევე მიიტაცებს კონკრეტული პიროვნებების ნებას და არ მოუხსნის უფლებამოსილებას. ანრი ოხანაშვილი ოპოზიციაზე - ვნახოთ, ხვალამდე რა პოზიციებს დააფიქსირებენ - თუ შესაწყვეტი იქნება, შეუწყდებათ უფლებამოსილება. გიორგი გახარია - ჩემი საბოლოო პასუხი არის ის, რომ დეპუტატის ადგილი არის პარლამენტში! მაიკლ გალერი - იმ არგუმენტების წამოწევა, რომლებიც ოპოზიციას აქვს, პარლამენტში სჯობს - არასამართლიანად მიღებული ხმების ჩამოკლების შემთხვევაშიც, დარწმუნებული არ ვარ, რომ საპირისპირო შედეგს მივიღებდით, მათ არგუმენტებს ავტომატურად 100%-ით ვერ მივიღებ. ვიოლა ფონ კრამონი - ოპოზიციისთვის პრესტიჟის შენარჩუნების ტიპის გამოსავალი გვჭირდება და არა ისეთი, როგორიც „ვარდების რევოლუციის“ დროს - ახლა, 2021 წელს ხალხის ქუჩაში გამოყვანის დრო არ არის. „გირჩი“ - თუ „ოცნება“ კოლეგებს უფლებამოსილებას შეუწყვეტს, „გირჩის“ მოქმედი პარლამენტის წევრებიც დაუყოვნებლივ ჩააბარებენ უფლებამოსილების შეწყვეტის შესახებ განცხადებებს. ნინო ბურჯანაძე - ვინ არიან ელისაშვილი და იოსელიანი, რომ ბალანსი შეცვალონ პარლამენტში?! - ელისაშვილი ყვირილით იყვირებს, შერცხვება თუ რა? კარგად ითამაშებს ოპოზიციონერის როლს და ამაშიც ფულს აიღებს. კარლ ჰარცელი - მოვუწოდებ ყველა მხარეს, თავი შეიკავოს ნებისმიერი კარის ნაადრევად დახურვისაგან, განსაკუთრებით ისეთი კარის, რომელიც, თუკი დაიხურა, სამუდამოდ დახურული დარჩება. პრეზიდენტი - მოვუწოდებ პარლამენტს, არ მიეცეს ერთპარტიული მართვის ცდუნებას და არ მიიღოს მანდატების შეწყვეტის ნაჩქარევი გადაწყვეტილება. მელია ზურაბიშვილზე - მანაც კი აღიარა, რომ პარლამენტი ერთპარტიულია.

      არჩევნების სიცრუე - შალვა პაპუაშვილი აცხადებს, რომ „სამართლიანი არჩევნების“ მიერ გამოქვეყნებული პარალელური დათვლის 2 ძირითადი მიგნებიდან ორივე მცდარი აღმოჩნდა, თუმცა, მზად არიან მათ წარმომადგენლებს შეხვდნენ.

      განახლებული ნაცები - გია ხუხაშვილი - „ნაციონალური მოძრაობა“ გარკვეული რებრენდინგის ჩატარებას ცდილობს - ახალგაზრდებს ყოველთვის აქვთ ის ენთუზიაზმი, რაც პოლიტიკას სჭირდება. ვახტანგ ძაბირაძე - როცა “ნაცმოძრაობის” პოლიტიკის განმსაზღვრელი ისევ სააკაშვილი რჩება, მელიამ რამდენი ახალი ხალხიც არ უნდა წარადგინოს, ჯერჯერობით მათ არც სიტყვა ეთქმით და არც პარტიის პოლიტიკა იცვლება. დავით მათიკაშვილი - გამიჭირდება პასუხის გაცემა, განახლება რამდენად უშველის „ნაცმოძრაობას“, ვიდრე მათი პარტიის ბელადი კვლავ სააკაშვილია.

      გარეჯელების საქმე - მიხეილ სარჯველაძე - შურისძიებისა თუ ძალაუფლების ჟინით დაბრმავებული ოპონენტები უმტკიცებენ ქართულ საზოგადოებას, თითქოს გარეჯი საქართველო არ არის. დავით მათიკაშვილი - ამ ქმედებებისთვის ამ სიტყვებისთვის, რომელიც დავით გარეჯთან მიმართებაში ოპოზიციიდან ისმის, საზოგადოება მათ თვითმმართველობის არჩევნებზე გამოუტანს კიდევ ერთ განაჩენს. პრემიერი - ყველამ თავი უნდა შევიკავოთ ნებისმიერი ნაბიჯისგან, ნებისმიერი სიტყვისგან, რომელმაც შეიძლება, თეორიულადაც კი დავით გარეჯის საკითხის პოლიტიზირებას შეუწყოს ხელი. მელაშვილი თავდასხმაზე - გადაბრუნებული და ამოჭრილი ლაპარაკი რომ აჩვენეს, ალბათ, იმის შედეგია. მშვენიერაძე - მელაშვილზე თავდასხმაზე პასუხისმგებლობა ეკისრება ხელისუფლებას.

      უღირსება მერიაში - ჩხოროწყუს მერიის შენობაში, მუნიციპალიტეტის ერთ-ერთი სკოლის მოსწავლეებმა საგაკვეთილო პროცესის შემდეგ საპირფარეშო დაასუფთავეს. ამის შესახებ თავდაპირველად ინფორმაცია სოციალურ ქსელში ერთ-ერთმა მოქალაქემ გაავრცელა. აღნიშნულ ფაქტზე შს სამინისტრომ გამოძიება 150-ე მუხლით დაიწყო, რაც იძულებას გულისხმობს. პრემიერი ჩხოროწყუში მოსწავლეების მიერ მერიის შენობის დასუფთავებაზე - ვერ წარმომიდგენია, ეს ადამიანები იმ შენობაში სამუშაოდ ხვალ როგორ უნდა მივიდნენ - უმკაცრესი რეაგირება ექნება ამაზე გამოძიებასაც და ხელისუფლებასაც.

      სურვილები ევროკავშირში - მაიკლ გალერი - ვისურვებდი, საქართველომ ევროკავშირის წევრობაზე განაცხადი გააკეთოს მაშინ, როცა ყველაფერ იმას გააკეთებს, რაც გასაკეთებელი აქვს - ამჟამად, სამწუხაროდ, ამ წერტილამდე ჯერ ნამდვილად არ მისულხართ.

      გარდაიცვალა თემურ წიკლაური.

საზღვარგარეთულები:

      #კოვიდმსოფლიო - Bloomberg - მსოფლიოში კორონავირუსის საწინააღმდეგო ვაქცინაცია 98.3 მილიონზე მეტ ადამიანს ჩაუტარდა. ავსტრალიაში კორონავირუსის 1 შემთხვევის გამო 2 მილიონამდე ადამიანი კარანტინში აღმოჩნდა. აშშ-ში კორონავირუსის 110 470 ახალი შემთხვევა გამოვლინდა და 1 789 ადამიანი გარდაიცვალა. სომხეთში კორონავირუსის 62 ახალი შემთხვევა გამოვლინდა და 4 პაციენტი გარდაიცვალა. რუსეთში კორონავირუსის 17 648 ახალი შემთხვევა გამოვლინდა, 437 ადამიანი გარდაიცვალა. პორტუგალიაში კორონავირუსით გარდაცვალების შემთხვევების თითქმის ნახევარი იანვარში დაფიქსირდა. ისრაელის ჯანდაცვის სამინისტრო - ვაქცინირებულ 715 000-ზე მეტ ადამიანს შორის კორონავირუსით 317 პირი დაინფიცირდა.