ქვეყანა გამოცოცხლდა. უფრო სწორად, კოვიდ პანდემია გამოცოცხლდა და ახალი ძალებით მიიწევს ახალი წარმატებისკენ - ინფიცირებებმა უკვე 5 ათასეულს გადააჭარბა და ეს მხოლოდ დასაწყისიაო, გვანიგეშეს. დღის მთავარი თემა კოვიდისა და აწ უკვე ომიკრონის შტამის გარდა, თიბისელების საქმეც იყო. მეინსტრიმში განცხადებები და ბრალდების მოლოდინები ისმოდა. განაჩენი არ გამოცხადებულა. რაც შეეხება ლარს - დოლარის ღირებულება - 3.0893 ლარია.

საქართველოს და მსოფლიოს ამბები | 11 იანვარი, 2021

      #კოვიდსაქართველო - საქართველოში კორონავირუსით ინფიცირების 5486 ახალი შემთხვევა დაფიქსირდა, გარდაიცვალა კიდევ 46 პაციენტი. „ომიკრონის“ 951 შემთხვევაა დადასტურებული. გიორგი ღიბრაძის განცხადებით, თუ ქვეყანაში ეპიდსიტუაცია ისე გაუარესდება, რომ სახელმწიფო პაციენტების სამედიცინო მომსახურებით უზრუნველყოფას ვეღარ შეძლებს, დამატებითი შეზღუდვების საკითხი დადგება. თამარ გაბუნია - ორსულების გარდაცვალების თავიდან აცილების ერთადერთი ქმედითი გზა შეიძლება იყოს ისევ აქტიური ვაქცინაცია, რომელიც ჯერ ძალიან დაბალ მაჩვენებელზეა. „ომიკრონის“ შემთხვევებიდან ჰოსპიტალიზაცია დასჭირდა ერთეულ მოქალაქეს, არცერთს არ დასჭირვებია ინტენსიური თერაპია ან რეანიმაცია და ძალიან მალე მოხდა მათი გაწერა ჰოსპიტლებიდან. წელს იქნება ბოლო ვადა, რომ ინფექციური საავადმყოფო გადავიდეს ახალ შენობაში და ეს საკითხი დაიხუროს. მიმდინარეობს მუშაობა თურქეთიდან მედიკამენტების აღიარებითი რეჟიმით შემოტანის მექანიზმზე, როგორც ეს რიგ სხვა ქვეყნებთან მიმართებითაა. უახლოეს დღეებში საკარანტინო პერიოდის განახლებული ვადები ჩამოყალიბდება. „ომიკრონმა“ დაგვანახა, რომ „მწვანე პასპორტის“ საფუძველი არის ცვლადი და უნდა დაექვემდებაროს გარკვეულ რევიზიას. დავით სერგეენკო - ჰოსპიტალიზაციის საჭიროების მქონე პაციენტების რაოდენობის გაზრდა მოსალოდნელია, ასეთ შემთხვევაში, კლინიკური სექტორის მზაობის გაზრდა იქნება ძალიან მნიშვნელოვანი. ამირან გამყრელიძის განცხადებით, თბილისში ინფიცირების დადასტურებული შემთხვევებიდან 60%, რეგიონებში კი - 30% „ომიკრონია“. „ფაიზერთან“ 2 მილიონი დოზის შესყიდვაზე მოლაპარაკებას მართავენ, ასევე, ქვეყანას გაკეთებული აქვს განცხადება იმ შემთხვევისთვის, თუ „ფაიზერს“ „ომიკრონისთვის“ სპეციფიური ვაქცინაც ექნება. თუ საჭიროება დადგა, საველე ჰოსპიტლების გამოცდილება ქვეყანას უკვე აქვს. გთხოვთ ყველას, ვისაც „ბუსტერი“ არ გაგიკეთებიათ, მიბრძანდეთ და გაიკეთოთ, თქვენი ოჯახის წევრებსაც მოუწოდეთ. გიდასტურებთ, რომ ეს არის „ომიკრონის“ შიდა გავრცელება, ეს აღარ არის იმპორტირებული შემთხვევები. სერგო ჩიხლაძე - კლინიკებისთვის კოვიდმიმღების სტატუსის შეწყვეტა გამართლებული არ არის - საწოლფონდი დაგვჭირდება იმაზე მეტი, ვიდრე გვჭირდებოდა, დამატებითი საწოლების დარეზერვება უნდა ხდებოდეს. ვატო სურგულაძე - ჩვენი სისტემა მზად არ არის და არაფერი კეთდება იმისათვის, რომ „ომიკრონის“ გავრცელება შევასუსტოთ - იანვრის ბოლოდან გადაივსება კლინიკები, გაიზრდება გარდაცვლილთა რაოდენობა.

      თბილისის საქალაქო სასამართლოში მამუკა ხაზარაძის, ბადრი ჯაფარიძისა და ავთანდილ წერეთლის სასამართლო პროცესი მიმდინარეობდა. მამუკა ხაზარაძე - რა გადაწყვეტილებაც არ უნდა მიიღოს მოსამართლემ, ბიძინა ივანიშვილმა ეს ბრძოლა ჩვენთან წააგო. ამ სამმა წელმა პირიქით, გაგვაძლიერა იმ რწმენაში, რომ არსებული რეალობა უნდა შევცვალოთ და ამისთვის არაფერი დავიშუროთ. გიგი უგულავა ხაზარაძე-ჯაფარიძის სასამართლოზე - სასჯელი იქნება მხოლოდ და მხოლოდ პოლიტიკური, რაც კიდევ უფრო მეტად დაძაბავს სიტუაციას. დავით სერგეენკო - მიუღებელია, წინასწარ იმის ცოდნის გარეშე, თუ რა გადაწყვეტილებას გამოიტანს სასამართლო, ნებისმიერ შემთხვევაში უნდობლობის გამოცხადება. მამუკა ხაზარაძე მოსამართლემ სხდომათა დარბაზიდან გააძევა, მოგვიანებით კი დააბრუნა. ხაზარაძე პროკურორს - რამე არ შეგეშალოს! შენ გგონია 9 წლის მეშინია? ციხეში წასვლის მეშინია? პროკურორი - მტკიცებულებები, რომელიც ადასტურებს ფულის გათეთრებას, ამავდროულად ადასტურებს თაღლითობას და მტკიცებულებები, რაც თაღლითობას ადასტურებს, ადასტურებს ფულის გათეთრებას. ჰერმან საბო - ხაზარაძის და ჯაფარიძის საქმე პოლიტიკურია, თუ მათ გაამტყუნებენ, იმედი გვაქვს, რომ პრეზიდენტი მყისიერად შეიწყალებს. დავით უსუფაშვილი - ხელისუფლება ებრძვის ურჩ ბიზნესმენებს - მსოფლიოში რომ არსებობდეს კვლევა ყველაზე არაპროგნოზირებადი მთავრობის გამოსავლენად, ივანიშვილის მთავრობა პირველ ადგილს დაიკავებდა. ნიკა მელია - ის, რაც მამუკა ხაზარაძის და ბადრი ჯაფარიძის წინააღმდეგ „სასამართლო პროცესზე“ ხდება, ოპოზიციის გამორჩეული ლიდერების უსინდისო და თავზეხელაღებული პოლიტიკური დევნაა! მამუკა ხაზარაძე - შემოთავაზება გვქონდა ბიძინა ივანიშვილისგან, იქნებ დავამთავროთო - ან ვალში უნდა იყო მასთან, ან უნდა იყო „გაშავებული" მის სიაში. ნინო ბურჯანაძე ე.წ. ფულის გათეთრების საქმეზე - ეს არის პოლიტიკური პროცესი, რაშიც ეჭვი არავის ეპარება - ვაფრთხილებ მოსახლეობას, ძალიან ძვირად დაუჯდებათ სიჩუმე, გვიან იქნება თითზე კბენანი. ავთანდილ წერეთელი - ამის შემდეგ ერთ ლარსაც არავის ვასესხებ - ტელევიზიები სულ იძახიან: ფულის გათეთრებაო, შვილიშვილი მოდის და ფულს მთხოვს, მომეცი, ფული უნდა გავათეთრო ბაბუაო. ბადრი ჯაფარიძე - 8 იანვარს 3 წელი შესრულდა, რაც პროკურატურამ მთელ მსოფლიოს ამცნო „ფულის გათეთრების“ საქმის გამოძიების შესახებ, 3 წელია ჩვენი შევიწროება და პოლიტიკური დევნა გრძელდება. ხაზარაძე პროკურორს - ნუ ნერვიულობ შენ ბიძინას ხსენებაზე რა! მე მაქვს უფლება დასკვნით სიტყვაში რაც მინდა ის ვთქვა! დამამთავრებინეთ! „მხედრიონის“ მსხვერპლიც ვარ, წინა და შევარდნაძის დროინდელი ხელისუფლებისაც, ტრაგედია და გატაცებებიც მაქვს გადატანილი, ყველაფერმა ჩვენს თავზე გადაიარა. ანა ბუჩუკური - იმედს ვიტოვებ, რომ ხაზარაძე - ჯაფარიძის საქმეზე გონივრული გადაწყვეტილება იქნება მიღებული. ბადრი ჯაფარიძე - დღესაც აბსოლუტურად იგივეს გავაკეთებდი - ეს უიმედო შემთხვევაა, მაგრამ იმედი გვაქვს, რომ ეს საქმე გახდება ამ ქვეყანაში პოლიტიკური დევნის დასრულების დასაწყისი. განაჩენი ხვალ გამოცხადდება.

      კახა კალაძე - მხოლოდ ერთობით, საერთო ზრუნვით შევძლებთ უკეთეს თბილისში ცხოვრებას. ჩემი დაპირება ე.წ. ყვითელი მიკროავტობუსების სრულად ჩანაცვლებასთან დაკავშირებით, შესრულებულია. დღეიდან თბილისში მედიკამენტების 500-ლარიანი ვაუჩერების პროგრამა ამოქმედდა. 14 იანვარს დედაენის ბაღში საახალწლო დასკვნითი კონცერტი გაიმართება. გაყიდული სამგზავრო აბონემენტების ნაწილი ერთწლიან ბარათებზე მოდის. თბილისის მეტროს ამოქმედებიდან 56 წელთან დაკავშირებით, მრავალწლიანი სტაჟის მქონე 15 თანამშრომელს საპატიო თანამშრომლის წოდება მიენიჭა.

      საქართველო-ამერიკა-რუსეთი - კელი დეგნანი - რუსეთს ვერ ექნება ვეტოს უფლება თქვენს სუვერენულ გადაწყვეტილებებზე - ჩვენ არ ვაპირებთ, მოვილაპარაკოთ საქართველოს შესახებ, საქართველოს გარეშე. სენატორები ჯო ბაიდენს - მნიშვნელოვანია, აშშ-მა აჩვენოს სიმამაცე და უარი თქვას პუტინის მოთხოვნების დაკმაყოფილებაზე - უკრაინის საკითხზე გადაწყვეტილება არ შედგება უკრაინის გარეშე, ეს უნდა გავრცელდეს საქართველოს შემთხვევაშიც. იან კელი - მე ძალიან იმედგაცრუებული ვარ საქართველოს ახლანდელი მთავრობით - საქართველო უკრაინას მხარს უფრო აქტიურად უნდა უჭერდეს. აშშ-ში რუსეთის საელჩო - აშშ-ს არ აქვს საფუძველი კოლექტიური უსაფრთხოების ხელშეკრულების ორგანიზაციას მისცეს რჩევები როგორ იმოქმედოს ყაზახეთში. თენგიზ ფხალაძე - რუსეთი ცდილობს „გაღმა შეედავე, გამოღმა შეგრჩება“ პრინციპით იმოქმედოს, რომ რაიმე მაინც გამოივაჭროს - ამ პერიოდში, მაქსიმალურად შეეცდება გამოიყენოს შანტაჟის ყველა შესაძლებლობა მეზობელ სახელმწიფოებზე. ელჩი - არ დავთმობთ ევროპულ უსაფრთხოებას, საქართველოს დევიზი ჩვენი დევიზია: „ძალა ერთობაშია!“.

საზღვარგარეთულები:

      #კოვიდმსოფლიო - ჩინეთის ქალაქ ანიანგში, კორონავირუსის გავრცელების გამო, მილიონობით ადამიანს სახლიდან გასვლა ეკრძალება. სომხეთში კორონავირუსის 243 ახალი შემთხვევა დადასტურდა და 2 ადამიანი გარდაიცვალა. რუსეთში კორონავირუსის 17 525 ახალი შემთხვევა გამოვლინდა და 783 ადამიანი გარდაიცვალა. ჯანმო - კორონავირუსის ენდემურ დაავადებად ჩათვლა ჯერ ნაადრევია.

      უკრაინის მხარე - ვლადიმერ ზელენსკი - კონფლიქტის დასრულებაზე არსებითი მოლაპარაკების დროა.

      ყაზახური ამბები - ყაზახეთის პრეზიდენტის ინფორმაციით, კოლექტიური უსაფრთხოების ხელშეკრულების ორგანიზაციის სამშვიდობო კონტიგენტის გაყვანა ორ დღეში დაიწყება. ყაზახეთის პრემიერ-მინისტრად ალიხან სმაილოვი დაინიშნა.