ერთმანეთისადმი სიყვარული უმანკოს გაგვხდის. ერთხელ ერთ ნაცნობ ადამიანს განვუმარტე ეს და ვუთხარი, რომ სიყვარული ჩვენში უბიწოებას შობს და მოყვასისადმი სიყვარული ცოდვას ჩვენში ყოველ შესასვლელს უხშობს; კიდევ მრავალი რამ ვისაუბრეთ და ამ დროს სხვა ნაცნობი ადამიანი მომიახლოვდა და მითხრა: რა არის სიძვა? ხომ შეიძლება გიყვარდეს კიდეც და თან უმრუშო? რამეთუ ესეც სიყვარულისგან მომდინარეობს. მართალია, ანგარებას, მრუშებას, შურს, სივერაგეს და სხვა ამათ მსგავსს შეუძლია მოყვასის სიყვარულს განგვაშოროს. მაგრამ როგორ აღასრულებს ამას სიძვა? მე ვუთხარი, რომ სიყვარულს ამის აღკვეთაც შეუძლია. ვისაც გარყვნილი ქალი შეუყვარდება, ეცდება მას სხვა მამაკაცები ჩამოაშოროს და მასთან ცოდვით დაცემისაგან თვითონაც თავს შეიკავებს. ამიტომ მასთან ცოდვით მხოლოდ ის დაეცემა, ვისაც მეძავი სძულს, ხოლო ჭეშმარიტად მოსიყვარულე - მიაქცევს მას ამ სამარცხვინო საქმისგან. გადაჭრით ვამბობ, არ არსებობს არც ერთი ცოდვა, რომელსაც სიყვარულის ძალა ცეცხლის მსგავსად არ შემუსრავს. გამომხმარეი ფიჩხი უფრო გაუძლებს ძლიერ ცეცხლს, ვიდრე ცოდვის არსება სიყვარულის ძალას. ჩვენს სულებში ამგვარი სიყვარული ავაღორძინოთ, რათა წმინდანების გვერდით აღმოვჩნდეთ, რამეთუ თითოეული მათგანი უფალს მოყვასისადმი სიყვარულით სათნოეყო. რატომ მოიკლა აბელი და მკვლელი არ გახდა? რა თქმა უნდა იმიტომ, რომ ძმა ძლიერ უყვარდა და მსგავს ფიქრს გონებაშიც არ გაივლებდა. კაენმა საიდან შეიწყნარა შურის შხამი? - არც მინდა მას აბელის ძმა ვუწოდო, - იქიდან, რომ მასსი სიყვარული ვერ განმტკიცდა. ნოეს ორმა ძემ ქება რით დაიმსახურა? იმით ხომ არა, რომ მამა ძლიერ უყვარდათ და ვერ შეძლეს მისი სიშიშვლე ეხილათ? ერთ მათგანს წყვეა რის გამო მოეწია? იმიტომ ხომ არა, რომ სიყვარული არ ჰქონდა? აბრაამი რით განდიდდა? სიყვარულის გამო, რომლის მეოხებითაც ძმისწულზე ზრუნავდა და სოდომელებს შუამდგომლობდა. წმინდანები ფრიად მოსიყვარულენი და თანამლმობნი იყვნენ.