ნეტარი დედის წარმოშობის შესახებ სამწუხაროდ ინფორმაცია არ მოგვეპოვება. სავარაუდოდ უბრალო წარმოშობის არ უნდა ყოფილიყო, რადგან მეუღლეს ანდრეი თეოდორის ძე პეტროვს პოლკოვნიკის ხარისხი ჰქონდა მინიჭბული და მეფის კარზე მსახურობდა.

ანდრეი 26 წლის ასაკში ცოდვათა მოუნანიებლად და უზიარებლად გარდაიცვალა. ამ ფაქტმა ძლიერ იმოქმედა ქსენიაზე – 26 წლის უშვილო ქვრივზე. ერთბაშად დაივიწყა ყოველივე მიწიერი. ამის გამო ბევრმა შეშლილად ჩათვალა. განსაკუთრებით მას შემდეგ, რაც ქსენიამ მთელი თავისი ქონება გლახაკებს დაურიგა, სახლი კი თავის ნაცნობს – პარასკევა ანტონოვას აჩუქა.

ნეტარმა თავისი ცხოვრება სრულიად შეცვალა. სალოსობის მძიმე გზა აირჩია. ქმრის კოსტუმში გამოეწყო და ყველას არწმუნებდა, რომ ანდრეი არ მომკვდარა, არამედ გარდაიცვალა მისი მეუღლე – ქსენია გრიგორის ასული.

რაიმე განსაზღვრული საცხოვრებელი ადგილი ქსენიას არ ჰქონდა. წელიწადის ნებისმიერ დროს ღამით მინდორში მუხლს იყრიდა , ლოცვაზე დგებოდა და მზის ამოსვლამდე ლოცულობდა. დღე კი დაეხეტებოდა პეტერბურგში. ხშირად წმიდა მოციქულ მათეს სახელობის ეკლესიის მრევლის რაიონში, სადაც ღარიბი ხალხი ცხოვრობდა.

საზრდელს კეთილი ადამიანები აწვდიდნენ. ეს სიბრალული განსაკუთრებით მას შემდეგ გაძლიერდა, რაც ტანსაცმელი ნეტარ დედას მთლიანად შემოაცვდა და ზამთარ-ზაფხულ საცოდავი ძონძებით დადიოდა.

ბევრი აძლევდა მას თბილ ტანსაცმელს, ფეხსაცმელს, მოწყალებას, მაგრამ ქსენია არაფერს იღებდა, მხოლოდ ხანდახან "მეფეს ცხენზე" (კაპიკებს მხედრის გამოსახულებით) და მაშინვე აძლევდა ისეთივე ღარიბებს, როგორიც თვითონ იყო.

მონაწილეობდა ტაძრის მშენებლობაში. (ღამით მალულად ეზიდებოდა ტყიდან აგურებს).

დაუცხრომელი ღვაწლისთვის წმიდანს განჭვრეტის, სასწაულთქმედების და კურნების ნიჭი მიემადლა. 45 წლის შემდეგ სული უფალს შეჰვედრა.

წელს რუსეთის მართლმადიდებელმა ეკლესიამ წმიდა ნეტარი ქსენია პეტერბურგელი წმიდანად შერაცხა. ხსენების დღედ ძველი სტილით – 24 იანვარი, ახალი სტილით კი 6 თებერვალი დაადგინა.

◄ გუშინ | დღეს | ხვალ ►