ერთი ქალი თავის დაქალთან, ახლადგაცნობილ მამაკაცზე ჭორაობდა, რომელსაც არც ისე კარგად იცნობდა. იმ ღამით ქალმა სიზმარი ნახა, მის თავს ზემოთ უზარმაზარი ხელი გამოჩნდა და მასზე მიუთითა. ქალი მაშინვე დანაშაულის წარმოუდგენელმა გრძნობამ შეიპყრო. დილით აღსარების სათქმელად წავიდა. სამრევლოს მოხუც მღვდელს - მამაო რურკის შეხვდა და ყველაფერი უამბო.

 - ჭორაობა ცოდვად ითვლება? - ჰკითხა ქალმა მოხუცს - ეს ყოვლისშემძლე ღმერთის ხელი იყო ჩემსკენ რომ თითი გამოიშვირა? უნდა მოვინანიო და შენდობა ვთხოვო მამაო? ნუთუ ცოდვა ჩავიდინე?

 - დიახ! - უპასუხა მამაო რურკიმ - დიახ!!! უვიცო, ცუდად აღზრდილო ქალო. შენ, შენი ახლობლის წინააღმდეგ ცრუ მოწმედ გამოხვედი, მას რეპუტაცია შეულახე და უნდა გრცხვენოდეს.

      ქალმა უთხრა რომ მომხდარით ძალიან წუხს და პატიება სთხოვა.

 - ასე სწრაფად არ გამოვა! - თქვა რურკიმ - მინდა რომ სახლში წახვიდე, ბალიში აიღო, სახლის სახურავზე ახვიდე, ბალიში დანით დაჭრა და ჩემთან დაბრუნდე.

      ქალი სახლში დაბრუნდა. საწოლიდან ბალიში აიღო. უჯრიდან დანა ამოიღო. სახანძრო კიბით სახლის სახურავზე ავიდა და ბალიში დანით დაჭრა. შემდეგ კი როგორც ნაბრძანები ჰქონდა მოხუც მღვდელთან დაბრუნდა.

 - ბალიში დანით დაჭერი? - ჰკითხა მღვდელმა.

 - დიახ მამაო!

 - და რა შედეგი მიიღე?

 - ბუმბულები დაიფანტა - უპასუხა ქალმა.

 - ბუმბულები დაიფანტა - გაიმეორა მოხუცმა.

 - გარშემო ყველგან ბუმბულები დაფრინავდა მამაო.

 - ახლა დაბრუნდი სახლში და ქარის წაღებული ყველა ბუმბული სათითაოდ აკრიფე.

 - არა, ეს შეუძლებელია - უპასუხა ქალმა - ქარმა ისინი ყველა მიმართლებით, აქეთ-იქით მოფანტა, როგორ შევძლებ მათ პოვნას?

 - აი, ესაა ჭორი! - თქვა მამაო რურკიმ.