ქალაქის დღესასწაული გამოვიარეთ და დაიწყო საქმიანი ორშაბათი. დიდი ოდენობით სატელევიზიო ხმაურიც არ დაგვაკლდა და დღის მთავარი თემები სპექტრულად გაიშალა, იყო პარლამენტის სპიკერის „სკანდალები“, კარასინის გაფრთხილებები, პრეზიდენტობის კანდიდატები და დამლაგებლები.

საქართველოს და მსოფლიოს ამბები / 8 ოქტომბერი, 2018 /

      სკანდალური თავმჯდომარე - ირაკლი კობახიძე - ვინც ხელს აფარებს ფაშიზმს, თავადაც ფაშიზმის თანამონაწილეა, სამწუხაროა, რომ ასეთი ადამიანები არასამთავრობოების ხელმძღვანელ პირებს შორისაც არიან. რომან გოცირიძე - ირაკლი კობახიძემ არ იცის, რა არის ფაშიზმი - არასამთავრობოების და ტელევიზიის დირექტორის ფაშიზმად მოხსენიება, უპასუხისმგებლობაა. ნინო ბურჯანაძე - ირაკლი კობახიძე ადრე არასამთავრობო სექტორში მუშაობდა და არ მახსოვს, მისი ხმა ფაშიზმის, ძალადობის წინააღმდეგ ყოფილიყო გამოხატული. მამუკა მდინარაძე ნიკა გვარამიაზე - როდესაც ერთ-ერთი წამყვანი ტელევიზიის ხელმძღვანელი საზოგადოებას ადამიანების გარიყვისაკენ მოუწოდებს, ეს ნამდვილად ფაშისტური განცხადებაა. დავით უსუფაშვილი „ქართულ ოცნებას“ - მიიყვანეთ მართლმსაჯულების წინაშე ყველა, ვინც დამნაშავეა ფაშიზმსა და ჰოლოკოსტში - ვინ ებრძვის ფაშიზმს და ჰოლოკოსტს არჩევნებში?

      პრეზიდენტობისთვის მებრძოლები - დავით ბაქრაძე ლანჩხუთის მოსახლეობას შეხვდა. ირაკლი კობახიძე - ჩვენი შიდა კვლევებით, სალომე ზურაბიშვილი დამაჯერებლად იგებს არჩევნებს, გრიგოლ ვაშაძემ კი შეიძლება მეორე ადგილიც ვერ დაიკავოს. ISFED - 3 კვირაში პოლიტიკური ნიშნით დაპირისპირების - 1, ამომრჩევლის სავარაუდო მოსყიდვის - 1, ადმინისტრაციული რესურსის გამოყენების - 9 ფაქტი დაფიქსირდა. ირაკლი კობახიძე - სალომე ზურაბიშვილის პოზიცია ძალიან მკაფიოა როგორც დასავლურ ინტეგრაციასთან, ასევე რუსულ აგრესიასთან დაკავშირებით. სალომე ზურაბიშვილი - ვფიქრობ, არჩევნების მეორე ტური არ იქნება და არც ველოდები. კახა კალაძე სალომე ზურაბიშვილისთვის ექიმების მიერ თანხის შეწირვას თავისუფლების გამოხატულების ერთ-ერთ მიმართულებად მიიჩნევს. ნინო ბურჯანაძე თამარ ჩუგოშვილს და ფრაქცია "ქართული ოცნების" ახალგაზრდა წევრებს მიმართავს, დაინტერესდნენ „ელიტური კორუფციით“.

      პოლიტიკური დამლაგებლები - გია ხუხაშვილი - მურუსიძე, ფარცხალაძე და სხვები, რომლებიც ალაგებდნენ და ალაგებენ საქმეებს, არ არის გამორიცხული, თავს შანტაჟით იცავდნენ. ლია მუხაშავრია - თუ ხელისუფლება არ გამოფხიზლდა, ფარცხალაძე მათ „პოლიტიკურ სარდაფში“ ჩაიყოლებს. ISFED - ფარული ჩანაწერები და ბრალდებები, საფუძვლიან ეჭვებს აჩენს ელიტარული კორუფციისა და არაფორმალური მმართველობის მიმართულებით.

      ცოლის გამოკითხვა - საქალაქო სასამართლოში პაატა ბურჭულაძის მეუღლის გამოკითხვა მიმდინარეობდა. პროკურორი - „იავნანას“ დოკუმენტაციის შესწავლა ცხადყოფს, რომ 700 ათას ლარამდეა დახარჯული პაატა ბურჭულაძის და მისი მეუღლის მგზავრობის ხარჯების ანაზღაურებისთვის.

      ომეგას საქმიანობა - „ომეგა ჯგუფში" შემავალი „ბეემვეს ცენტრის" დირექტორის მოადგილემ სასამართლოში გამოკითხვა მოითხოვა. "ომეგა ჯგუფში" შემავალი კიდევ ერთი კომპანიის წარმომადგენელი დავით ფანქველაშვილი თბილისის პროკურატურაში გამოკითხვაზე მივიდა. დავით სერგეენკო „ომეგა ჯგუფზე“ - ეს საგადასახადო საკითხია, რომელიც პოლიტიზირდა, იმისთვის, რომ ამ კომპანიის მფლობელს, სავარაუდოდ, გადასახადის გადავადება უნდა.

      კარასინის გაფრთხილებები - გრიგორი კარასინი - ვაფრთხილებთ ქართველ პარტნიორებს, მათი ქცევა საფრთხის ქვეშ აყენებს ურთიერთობების ნორმალიზების პროცესს. გრიგორი კარასინი - საქართველოსთან უვიზო რეჟიმის დაწესება გამორიცხული არ არის.

      ბიზნესის დაწყება - სოფო კილაძე მძიმე, მავნე და საშიშპირობებიანი ბიზნესის რეგისტრაციის ვადებთან დაკავშირებით განცხადებას ავრცელებს.

      ღვინის ექსპორტი - ქართული ღვინის ექსპორტი 13%-ით, ხოლო ექსპორტირებული ღვინის ღირებულება 22%-ით გაიზარდა.

      ქართული მარკა - ქართული საფოსტო მარკა „EUROPA 2018 - ბესლეთის ხიდი“ ევროპის მარკების კონკურსის გამარჯვებულია.

      შავი ბაზარი - ლევან იზორია - მოვისმინე შეფასებები, თითქოს ტყვია-წამალი იყიდებოდა „შავ ბაზარზე“ და სახელმწიფო უსაფრთხოებას დაემუქრა საფრთხე - მოპოვებული მტკიცებულებებით, ასეთი საფრთხე გამოირიცხება.

საზღვარგარეთულები:

      ინტერპოლის ნაპოვნი პრეზიდენტი - ინტერპოლის პრეზიდენტი, რომელიც ჩინეთში დააკავეს, თანამდებობიდან გადადგა.

      საპრეზიდენტო საჩუქარი - მადლენ ოლბრაიტი - ტრამპი პუტინისთვის ნამდვილი საჩუქარია.

      ევროკავშირის მოთხოვნები - ევროკავშირი რუსეთისგან ოლეგ სენცოვისა და უკანონოდ დაკავებული ყველა უკრაინელის დაუყოვნებლივ გათავისუფლებას მოითხოვს.

      აეროპორტების დახურვის მუქარა - იტალიის შს მინისტრი - ბრიუსელში ან ბერლინში თუ ვინმე ფიქრობს, რომ იტალიაში მიგრანტებს ჩამოიყვანენ, უნდა იცოდნენ, რომ ყველა აეროპორტს დავხურავთ.

      ნაკადები - პოლონეთის პრემიერი იმედს გამოთქვამს, რომ აშშ „ჩრდილოეთ ნაკადი -2“-ის პროექტს სანქციებს დაუწესებს.

      გერმანული პასუხისმგებლობა - გერმანიის საგარეო საქმეთა მინისტრი - დაინტერესებულნი ვართ, რომ ჩვენს თავზე უფრო მეტი პასუხისმგებლობა ავიღოთ უსაფრთხოების საკითხებში.