უსასრულოდ გაფანტულ  სივრცეში არსებობენ ჭრელი ფარშევანგები ოცნებებით თავს არ იწუხებენ, რეალობას ირჩევენ,ამ წუთისოფლით ტკბებიან. ფარშევანგებით დაფარული სივრცე უფრო იზრდება, როდესაც რწმენა იბუდებს ზეცის კიდეზე  და მის შემოგარენში. საკუთარი სული უყვარს  ამაყ თავმომწონე ფარშევანგს . მერე რა, რომ ვიღაც სიამაყეს დასწამებს, მთავარია, რომ უყვარს და სურს ბედნიერება. მას კარგად ესმის, რომ ბედნიერება შრომით და რწმენით მიღწევადია. ვარდისფერი სათვალეები არ სჭირდება, რადგან არ აკლია მას არც ვარდის ფერი და არც, რომელიმე ფერი ფერთა გამიდან, რადგან თვითონაა ფერთა კონა და სილამაზის ელექსირი. სულიერი სამყარო ფარშევანგისაც კი ზოგჯერ სევდიანია და აღმაფრენასა და სიხარულს მაშინ გამოხატავს , როდესაც ფრთებს გაშლის და გაინავარდებს. სწორედ მაშინაა ის წარმოუდგენლად მშვენიერი და სულიერად შიშველი. უტვინო მნახველი კი მხოლოდ მისი ბუმბულისა და ფერის სილამაზეს უსვამს ხაზს და არ ესმის, რომ ფრინველსაც აქვს გული და განწყობა, აქვს სული და უნარი იყოს კეთილი ან ბოროტი, თუმცა ბოროტი არავინ იბადება, ბოროტები შემდეგ ხდებიან. მაგალითად ავიღოთ ლუციფერი, ღმერთის ქმნილება და სხივოსანი ანგელოზი, რომელმაც შემოქმედს გაუტოლა თავი. ფარშევანგი კი თავს არავის უტოლებს, რადგან იცის, რომ მისი ტოლი და სწორი არავინაა. ის თავს შემოქმედის შვილად აღიარებს და პატივს სცემს მას, თუმცა სხვები ადანაშაულებენ, რომ ის არაა მორწმუნე. მათი საუბარი ფარშევანგს ბატების ყიყინი ჰგონია და ასეთი ფრინველებისგან თავს შორს იჭერს. მას ებრალება საბრალოება, რადგან თვლის, რომ საბრალო არ უნდა იყოს ადამიანი. არა არ შემშლია, ნამდვილად ადამიანს ვგულისხმობ, რადგან ეს ფარშევანგი, ადამიანია, ქალი! ფარშევანგი ქალის ემოციაა, წუხილი. ზოგჯერ მომხიბვლელი, ზოგჯერ თავხედი უკარება და ნაზი. როგორ მღერიან ფარშევანგები? ფარშევანგს სიმღერა დედამ ასწავლა და მას შემდეგ, ერთხელ მღერის რადგან ერთხელ აღწევს აღმაფრენას. ერთხელ განიცდის სიყვარულს, ერთი აქვს ნატვრა...მომავალი ესახება ისეთი, როგორიც თვითონაა. ფარშევანგებს უყვარდებათ ისე, როგორც გული უკარნახებთ და არა ისე როგორც საზოგადოება. სიყვარული წარმოუდგენიათ ისე როგორც ყოვლისმომცველი ღმერთი და ნიჭიერი შემოქმედი. ნიჭი კი შემოქმედის შვილებსაც უხვად აქვთ და მომავლის ასაშენებლად არ სჭირდებათ ჰოროსკოპო, რადგან ვარსკვლავზე უკეთ თავად იციან საით მიიყვანს სიყვარულის თეთრი გედი.

პოსტი,  ეკუთვნის სტუდენტ გიორგის, მადლობა  მაას !