გაოცებული დიდხანს უყურებდა ქვემოდან, ვიდრე კისერი არ ეტკინა.

- პატარავ, შენ ალბათ თოვლის ქულა ხარ, ხომ?

- აქ რა გინდა ჯესი? - გამოჩნდა მარიაც.

- დავინახე კოლომბო როგორ გავიდა თქვენი ახალი თავშესაფრიდან და ვიფიქრე უნდა გველაპარაკა.

- რაზე?

- იცი მარია, არ მომწონს, რომ განაწყენებულები ხართ ჩემზე.

- არ მიკვირს, არავის მოსწონს შემცირებები, განსაკუთრებით მათ ვინც სხვების ხარჯზე უშრომლად ნებივრობენ. მაგრამ გაიხსენე - შენ თავად წახვედი ჩვენგან.

- მე კოლომბო მიყვარს!

- კი, თუ მის გამოყენებას სიყვარული ჰქვია ნამდვილად გიყვარს.

      უხერხული სიჩუმე ჩამოვარდა.

- მარია სიყვარული რა არის? - იკითხა თოვლის ქულამ.

- აი, ჯესიკა გეტყვის.

- კარგი მარია, ვატყობ ტყუილად მოვედი. მეგონა დამეხმარებოდი დაბრუნებაში, მაგრამ საქმე იმაზე რთულად ყოფილა ვიდრე მე მეგონა. მგონი ახლა უკვე შენც შეგიძლია აუხსნა თოვლის ქულას რა არის სიყვარული. - ბოლო სიტყვები უკვე ზურგშექცეულმა წარმოსთქვა, ბუჩქებიდან გაძვრა და გაუჩინარდა.

- მარია, რა არის სიყვარული?

- სიყვარული არის ის, ვინც...

- რა ვინც მარია? ვინც რა?

- არაფერი თოვლის ქულა. დაივიწყე. სადაცაა კოლომბო და ტარაკანი დაბრუნდებიან.