ემმის დაჯილდოების ცერემონიალიდან დაბრუნებული ჯორჯ მარტინი კომპიუტერს მიუჯდა, თავის ბლოგზე შევიდა და გამოაქვეყნა პოსტი სახელწოდებით "ახალი რეკორდი".

      წიგნისგან განსხვავებით, ბლოგზე ჯორჯ მარტინი სიტყვაძუნწია, მარტივ და მოკლე წინადადებებს წერს.

      "დავბრუნდი ემმის დაჯილდოებიდან, ლოს ანჯელესიდან.

      დაუვიწყარი ღამე.

      სამეფო კარის თამაშებმა ახალი რეკორდი დაამყარა. მისმა სერიებმა გასულ კვირაში 8 ემმი, ხოლო კვირას (20 სექტემბერს) კიდევ 4 ჯილდო მოგვიტანა."

      მართლაც მსოფლიო რეკორდთან გვაქვს საქმე. ასეთი რამ აქამდე არ მომხდარა. წინა რეკორდი, როგორც თავად მსოფლიო ბესტსელერის ავტორი წერს, ეკუთვნოდა "დასავლეთ ფლანგს" (The West Wing).

      სამეფო კარის თამაშები, თუ სატახტო თამაშები, გნებავთ სამეფო თამაშები წელს 12 ემმით დაჯილდოვდა.

      20 სექტემბერს მსოფლიო კინოინდუსტრიის თვალი მიბრუნებული იყო კალიფორნიისკენ, სადაც ემმის ყოველწლიური და უკვე რიგით 67-ე დაჯილდოება უნდა გამართულიყო მაიკროსოფთის თეატრში, ლოს ანჯელესში (Emmy Awards 2015).

      სულ სამი სერიალი დაჯილდოვდა, როგორც სერიალი, დანარჩენი ჯილდოები კი მსახიობებს ერგოთ.

1.       საუკეთესო დრამატული სერიალი: "სამეფო კარის თამაშები" Game of Thrones
2.       საუკეთესო კომედიური სერიალი: "ვიპი (ვიცე პრეზიდენტი)" Veep
3.       საუკეთესო მინი სერიალი: "რა იცის ოლივიამ?" Olive Kitteridge

      სამეფო კარის თამაშებმა პრიზები აიღო:

      საუკეთესო მეორეხარისხოვანი როლი დრამაში, საყვარელი სამეფო ჯუჯა: პიტერ დინქლეიჯი;

      საუკეთესო დრამატული სერიალის ავტორი რა თქმა უნდა დ. ბ. უაისი გახდა და მეორე ემმი იმავე ნომინაციაში დევიდ ბენიოფს ხვდა წილად.

      და მეოთხე ემმი იმავე დაჯილდოებაზე, სამეფო კარის თამაშებიდან ერგო რეჟისორს დევიდ ნატერს.

      საინტერესოა, რომ საუკეთესო მეორეხარისხოვანი როლი დრამის შესრულებისთვის ერგო უზო აბუდას, არადა ამ მონიმაციაში სამეფო წარმომადგენლები იყვნენ დრაკონების დედა ემილია კლარკი და დედა-დედოფალი ლენა ჰედი.

      დავუბრუნდეთ ჯორჯ მარტინს, მან ბლოგის მკითხველებს მოუბოდიშა გადაღლილობის და ზედმეტი სიხარულის გამო, ხვალ მადლობებს დავწერო - სხვა მაინც არაფერი ამქვს სათქმელი გარდა იმისა, რაც ემმის დაჯილდოებაზე ვთქვიო. ჰოდა, იქ ხომ "მადლობა ყველას" არის მთავარი მესიჯი.