ესეც ახალი წელი. ბევრი რამის დღესასწაულობა და აღნიშვნა მსმენია (ამჯერად საერო დღესასწაულები იყოს) - დაბადების დღის, დაოჯახების, შვილის ყოლის, დამოუკიდებლობის აღდგენის, გათავისუფლების, ოლიმპიადის მოგების, კონსტიტუციის დაწერის, სახლის აშენების, სამსახურში დაწინაურების, რევოლუციის აღნიშვნის. რელიგიურობაშემატებული დღესასწაულებიც გამიგონია, მოსავლის აღების, გაზაფხულის ან შემოდგომის მოსვლის, გვალვისას წვიმის მოსვლისაც და ყინვაში მზის გამონათების, მაგრამ რიცხვის ცვლის ზეიმი, დამეთანხმეთ ძალიან უცნაურია, თუ მათემატიკოსი ან ფიზიკოსი არ ხარ და ეს რიცხვი კაცობრიობის სამეცნიერო ისტორიას არ ცვლის ან ჰმატებს რაიმეს. მე კი ამ მეცნიერებებისგან შორს ვარ და ამის მიუხედავად აგერ უკვე ორ ათეულ წელზე მეტია ვზეიმობ და არც კი ვიცი რას ვზეიმობ. ახალი წელი, ანუ ახალი რიცხვი კალენდარზე, ყოველი ახალი რიცხვი საზეიმოა?! დროსა და სივრცეში მოქმედების ამბავია, თორემ კუები ალბათ ყოველი ახალი თვის დაწყებას ზეიმობენ. მაგრამ, გვაქვს ის რაც გვაქვს.

      მოსვლაზე ვსაუბრობდი და ამ ახალ წელს ჩემს ცნობიერებაში პირველად, თოვლი მოვიდა. მთელი დეკემბერი სითბო გვაწუხებდა, ზუსტად 1 იანვარს, ღამით თოვა დაიწყო - პირველი თოვლი პირველ იანვარს. მალევე გადაიღო, მაგრამ ეს უკვე მეორე ხარისხოვანია, მთავარია მოთოვა. ამ ახალ წელს რაღაც მაინც მოვიდა, თორემ სხვა მხრივ ერთი ჩვეულებრივი ტრადიციულად ახალწლური დღე იყო - მთელი დღე ალაგებ, ასუფთავებ, საჭმელს აკეთებ, სახლს რთავ, წესრიგდები და ლამაზდები, თავს ინახავ, (საჭმელად და სასმელად) გშია, კუჭი გტკივა, ორი დღის აღებულ დეკემბერის ხელფასს საჩუქრებში, საჭმელებსა და მაშხალებში ერთიანად მიაფშვნი, იმის გამო რომ 12 საათს დაელოდო, შუა ღამისას ჭამო და იზეიმო ახალი რიცხვი კალენდარზე. ჰო, ძალიან მაგარია! ხალხი ხომ ბრძენია, ჰოდა, გვაქვს ის რაც გვაქვს.

      მაგრამ ჭკვიანურია. ახალი წლის ზეიმი თითქმის ყველა ქვეყანას აერთიანებს, თუ არ ჩავთვლით იმ ქვეყნებს, რომლებიც ახალ წელს ასე ჩვენსავით და ჩვენს დროს არ ზეიმობენ. სხვაგვარად, ეს კაცობრიობა იმდენად დაცემულია, წარმოიდგინეთ აბა ჩემი ჩამოთვლილი დღესასწაულებიდან რომელიმეს რომ მთელი მსოფლიო ერთსულოვნად ზეიმობდეს, მაგალითად ვისამე დაოჯახებას, სამსახურში დაწინაურებას, სახლის აშენებას, ვალების გასტუმრებას და ა.შ. წარმოუდგენელია ჰო? უფლის შობის, განკაცების დღეზეც კი ვერ შევთანხმებულვართ, არათუ ვისამე ცნობილ-უცნობი ადამიანის სიხარულის გაზიარებ შევძლოთ. ხალხი ხომ კეთილშობილია, ჰოდა გვაქვს ის რაც გვაქვს.

      2015 დანაკარგების წელი აღმოჩნდა ჩემთვის, ზოგი დანაკარგი კი ისეთია, რომ არ შუშდება, არადა 2014_შიც ვიზეიმე ახალი წელი - 2015, მოკლედ, გვაქვს ის რაც გვაქვს! 

      ახალ წელს გილოცავთ მეგობრებო! არ ვიცი თავისთავად წელს რისი მოტანა შეუძლია, მგონი არც არაფრის. წელი ვერაფერს ვერ მოგვიტანს გარდა რიცხვებისა კალენდარზე, ამიტომ 2016 წელი ადამიანთა შორის სიკეთის, სიყვარულის, ურთიერთპატივისცემის, გონიერების, მადლის მოხვეჭისა და გაცემის, სიქველისა და ქველობის წელი ყოფილიყოს!

გილოცავთ!