- საჭმელს მოვიტან და მოვალ, შენ ხომ არ გცივა?
- არა შვილო.
- კარგი, მალე დავბრუნდები.

      კარის ხმას დაუცადა და შემდეგ ტელევიზორისკენ გადაბრუნდა.

"როგორც სინოპტიკოსები იუწყებიან, ჩვენს რეგიონში ძლიერი ყინვე..."

* * *

- გამარჯობა, ორი ქილა მაწონი მომეცით და ის 800 გრამიანი შეკვრა წიწიბურა თუ შეიძლება - უთხრა დახლიდარს და 5 ლარიანი გაუწოდა.
- იცით, მაწონი გაძვირდა და...
- კარგით, მაშინ იყოს 1 მაწონი.
- მოიცადეთ, ხურდა გეკუთვნით 70 თეთრი, ინებეთ.

* * *

- დედა დავბრუნდი.
- გარეთ თოვლია შვილო?
- კიი დედა, თოვს.
- ჰო, ტელევიზორში ამინდს აცხადებდნენ და გაითიშა.
- ალბათ შუქი წავიდა. ახლავე რამეს მოგიმზადებ...
- ჩაგვიჭრეს ალბათ ამ გასაწყვეტებმა. ეს პენსიაც რომ აღარ გვკმარა.
- ...

* * *

- შვილო, სანთელი მაინც აანთე.
- რად გვინდა დედა, კარგი შუქი შემოდის გზიდან. დავიძინოთ.
- შენ რა მანდ წვები? დივანზე? შეგცივდება.
- არ მცივა, კარგად დავიფარებ. შენ ხომ არ გცივა? გინდა მეორე ადიელაც დაგაფარო?
- არ მცივა მე, შენ გაცივდები იცოდე, რა ჯიუტი ხარ!

* * *

- გძინავს შვილო? ჩემს ჭიქაში წყალი გაყინულა და შეგიძლია მომიტანო?
- ...
- ე.ი. გძინავს. კარგი, დილით დავლევ.

* * *

- დედა, ნახე ტელევიზორიც ამუშავდა და ჩვენზე ლაპარაკობენ, მთელს ქვეყანას გაუგია ჩვენი ამბავი. ახლა მოვლენ და გვიშველიან. ნახე, ჩვენი მეზობელი, იმას დაურეკავს.
- ეს ვინ არის?
- არ ვიცი, ფსიქიურად ავად იყვნენო ჩვენზე ამბობს, თითქოს სხვა გზა გვქონდა, ფსიქიკურად ჯანმრთელი ვინღა არის ამ ქვეყანაში?. აი, გავყინულვართ დედაჩემო, შენ კიდევ ამბობდი მეორე ადიელა არ მინდაო.
- შენ კიდევ... ჯიუტო! არ დამიჯერე.
- ჩვენ გავიყინეთ ჩემო მოხუცო დედა! ბედნიერები ვართ, ჩვენ ერთმანეთის სიკვდილი არ გვინახავს.