იმის გარდა, რომ საგანმანთლებლო, შემეცნებითი მასალებით სავსე ქველი, თავად განათლების შესახებ თემებს რამდენიმე ბლოგ პოსტიც მიეძღვნა (აღარაფერს ვამბობ, წიგნებსა თუ ნაშრომებზე, რომელიც ამ სფეროში მოღვაწეთა საჭიროებებს ხმარდება). ამჯერადა, კვლავ მინისტრი ჯეჯელავა მოხვდა ჩემი ბლოგის თემაში და ისევ აჟიოტაჟი მის გარშემო. საინფორმაციო სააგენტოები წერენ, რომ მინისტრი კომბლეს იწუნებ და მათ ნაცვლად, სუპერმენსა და სხვა სუპერ გმირებს გვთავაზობსო. როგორც წესი, გადაუმოწმებელ ინფორმაციას არ ვენდე და მოვუსმინე მინისტრს - ზუსტად რას ამბობსთქო. (ადრე, ხომ გუგლ მეხსიერებას გვთავაზობდა.)

      ერთ-ერთი ინტერვიუში, განათლების მინისტრმა თქვა, რომ საზოგადოების პრობლემა იწყება საზოგადოების აღზრდიდან, აღმზრდელობითი ასაკიდან, რაც უპირველესად სკოლას და სკოლამდელ პერიოდს უკავშირდება და ამ მხრივ, შესაცვლელი გვაქვს, არა მხოლოდ საგანმანათლებლო პროცესის მსვლელობა, არამედ, თვით ზღაპრები და მულტფილმებიც კი (ეს უკანასკნელნი საერთოდ არც კი გვაქვს, თუ არ ჩავთვლით საბჭოთა დროინდელ მულტფილმებსო).

      ჟურნალისტის შეკითხვაზე, რას ერჩოდა ბატონი მინისტრი კომბლეს, ჯეჯელავამ უპასუხა, რომ კომპლე არის ცუდი მეცხვარი და მოძალადე. ცუდი მეცხვარეა, რადგან ჰყავს მხოლოდ 2 ცხვარი (მულტფილმში ძროხა ჰყავს და საინტერესოა, მულტიპლიკაციურ ვერსიაზე რას იტყოდა მინისტრი). რეალურად, კარგ მეცხვარეს დიდი ფარა უნდა ჰყავდეს, ამას კი მხოლოდ 2 ცხვარი ჰყავს და იმათაც არ უვლის. რეალურად, მეცხვარეობით არ არის დაკავებული და მისი მთავარი საქმიანობაა კომბლების თლა, და თუ ამ ორ, უპატრონოდ მიგდებულ ცხვარს რამე შეემთხვევა, კომბლები მზად აქვს ძალადობისთვის. ასეთი ზღაპრების ნაცვლად, მინისტრი კომიქსების სუპერგმირებს გვთავაზობს ან მათ ქართულ ვერსიებს, რომლებიც გმირები იქნებიან ბავშვებისთვის.

      კომიქსებზე ერთხელ უკვე ვისაუბრეთ. რა თქმა უნდა, კომბლეს ცუდ მეცხვარეობაზე კამათი არ შეიძლება, ეს ახალი ნამდვილად არ არის, ისევე როგორც ნაცარქექიაა ანტიგმირი, ზარმაცი და უშრომელი, რომელიც მოხერხებულობით ამარცხებს დევს ან აფერისტი ხუთკუნჭულა, რომელიც საბოლოოდ ძმებსაც შეაჭმევს დევს (იცოდით/გახსოვდათ რომ ხუთკუნჭულა იმერელია? მე პირადად ახლა გავიგე, მოვაყოლე ძმიშვილს მისი ზღაპარი და იმერელი რომ ახსენა, ჯერ არ დავუჯერე, მერე ინტენეტ ვერსიები დავძებნე და მართალი ყოფილა - "თუ იმერელი ხარ, მაშ შენ კაი ხელობა გეცოდინება, რას გააკეთებ საკვირველსაო"). მაგრამ კომიქსებშიც, რომ არ გვაქვს საქმე მთლად სახარბიელოდ? მაგალითად: გმირები, რომლებიც უარს ამბობენ გმირობაზე და ფსევდოთავმდაბლობით იმალებიან და გმირები, რომლებიც ამპარტავნდებიან, ბოროტდებიან და მარცხდებინ მაშინ, როდესაც მათი დამარცხება შეუძლებელია (იდეაში). გმირები, რომლებიც იმაზე უფრო მოძალადეები არიან, ვიდრე კომბლე ან სხვა. რა ვუშველოთ ასეთ კომიქსებს, როგორი გმირები უნდა შეიქმნას ჩვენი რეალობისთვის, რომელიც უკეთ აღზრდიდა საზოგადოებას?

გავცვალოთ ვერსიები.