ოთახში გამოკეტვის სეზონი მოვიდა. ამბობენ, უღატაკეს ონორე დე ბალზაკს მხოლოდ შაქრიანი ყავის სმა ასუქებდა, თორემ იმდენად უჭირდა, საჭმელი მხოლოდ ფანტაზიაში შეეძლო წარმოედგინაო და ასეც იქცეოდა თურმე - დაიდგამდა ყავას, ჩამოწერდა კერძებს თავისი მომზადების წესებითა და არომატის შესაძლო ვერსიებით, მოსვამდა ყავას და წერდა შედევრებს (წაიკითხეთ!).

      რომი ძლიერი სპირტიანი სასმელია და შაქრის ლერწმისგან მზადდება. Qwellynaria დღევანდელ რეცეპტში, სწორედ ბალზაკის ჩაწერილ შოკოლადის ტარტის რეცეპტს გთავაზობთ რომის უგემრიელესი არომატით!

შემადგენლობა:

ტარტის ცომი

• ფქვილი - 150 გრ;
• კაკაო - 30 გრ;
• შაქრის პუდრი - 75 გრ;
• კარაქი, ცივი, კუბიკებად დაჭრილი - 100 გრ;
• 1 მოზრდილი კვერცხის გული;
• ცივი წყალი - 2-3 ჩ/კ.

გულსართი

• შავი შოკოლადი (სხვილად დატეხილი) - 350 გრ;
• კარაქი, კუბიკებად დაჭრილი - 180 გრ;
• მუქი რომი - 2 ს/კ
• 2 მოზრდილი კვერცხი
• 2 მოზრდილი კვერცხის გული
• შაქარი - 2 ს/კ
• კაკაო - 1 ს/კ
• შაქრის პუდრი - 1 ს/კ

მომზადება:

ტარტის ცომი

      ფქვილი, კაკაო, შაქარი და კარაქი სამზარეულოს კომბაინში მოათავსეთ და დაანამცეცეთ;

      დაუმატეთ კვერცხის გული და 2 ჩაის კოვზი წყალი. აურიეთ და თუ საჭიროა, წყალი დაუმატეთ, რომ ცომი შეიკრას და ერთგვაროვანი გახდეს.

      გადმოიღეთ ბლენდერიდან და სწრაფად მოზილეთ ხელით, რომ დარბილდეს.

      მოათავსეთ პატარა ჯამში, დააფარეთ სამზარეულოს ცელოფანი და 30 წუთით შედგით მაცივარში.

      შემდეგ სუფთა, ცოტა ფქვილმოყრილ დაფაზე დადეთ და 5 მმ სისქეზე გააბრტყელეთ.

      წაუსვით ცხიმი 25 სმ დიამეტრიან ტარტის ყალიბს, რათა ადვილად გადმოიღოთ ნამცხვარი გამოცხობის შემდეგ; ცომი საცხობ ყალიბში მოათავსეთ და გვერდებიდან ზედმეტი ცომი ჩამოაჭერით. ისევ შედგით მაცივარში გასაციებლად 30 წუთით;

      გამოიღეთ, თავზე დააფარეთ პერგამენტის ქაღალდი და მშრალი, მარცვლეული (ბრდა, ცერცვი, ოსპი, ბრინჯი და სხვა) მოაყარეთ სიმძიმისთვის.

      წინასწარ გააცხელეთ ელექტროღუმელი 180° ცელსიუსზე (აირღუმელი დააყენეთ ნიშნულზე 4);

      შედგით ღუმელში და გამოაცხვეთ 12 წუთის განმავლობაში. მოაცალეთ სიმძიმე და ქაღალდი. აცხვეთ კიდევ 5 წუთი;

იხილეთ ფოტოილუსტრაცია.

გულსართი

      შოკოლადი და კარაქი ორთქლის აბაზანაზე გაადნეთ. ურიეთ, სანამ ერთგვაროვანი არ გახდება. დაუმატეთ რომი და გადადგით გასაციებლად;

      მიქსერით კარგად ათქვიფეთ კვერცხი, კვერცხის გულები და შაქარი;

      თანდათან დაუმატეთ შოკოლადის ნაზავი. კარგად აურიეთ.

      ჩაასხით საცხობ ყალიბში და აცხვეთ 10 წუთი, სანამ გვერდები არ ამოიწევს, გადადგით გასაციებლად;

      პატარა ჯამში შეურიეთ კაკაო და შაქრის პუდრი. მოაყარეთ ტარტს ზემოდან.

      სუფრაზე მიიტანეთ თბილი ან შეგრილებული.

გემრიელად მიირთვით!