მიწათმოქმედების და მეცხოველეობის ქვეყანაში ყველაზე ბუნებრივი საკვები არის ყველი და პური (და ყველაზე კარგი მასპინძლობა კი - კეთილი გულით). ყველისა და პურის გარითმვით ისედაც ხაჭაპური მიიღება, მაგრამ ეს უკანასკნელი, პურის გამოცხობამდე - ცომში ჩადებული ყველიდან დაიწყო. დაიწყო და მოედო საქართველოს ყველა კუთხეს. მოგვიანებით, როცა განვითარდა მეფრინველეობა, ხაჭაპურს დაემატა კვერცხი (გურიაში, სამეგრელოში, აჭარაში), ამერიკული კულტურების ჩვენში შემოსვლამ დასაბამი დაუდო ახალ იდეას - კარტოფილით დაუწყეს ხაჭაპურს შეკმაზვა (ოსეთი, სამცხე-ჯავახეთი). დედაქალაქში პურის მოდიფიკაციაზეც იფიქრეს და ფენოვან ცომში გამოაცხვეს - იხრაშუნოსო.

      რით იქნებოდა გამორჩეული Qwellynaria, რომ ტრადიციული ხაჭაპურების გვერდით (იხილეთ ხაჭაპურის რეცეპტები), საკუთარი, თანამედროვე, ორიგინალური და ექსკლუზიური ვერსია არ შემოეთავაზებინა.

შემადგენლობა:

• ფენოვანი ცომი - ერთი ფირფიტა;
• ვიჩინა - 8 ნაჭერი;
• სულგუნი - 4 ნაჭერი;
• კარტოფილი - 1;
• კვერცხის გული - 1;
• არაჟანი - 1 ჩ/კ;

მომზადება:

დადგით კარტოფილი მოსახარშად; გირჩევთ, კარტოფილი მოხარშოთ მარილიან წყალში ან თუ გაქვთ, შემდეგ შეკაზმოთ სვანური მარილით;

მოხარშული კარტოფილი დაჭერით ალყა-ალყა;

კვერცხის გული ათქვიფეთ არაჟანთან ერთად;

ფენოვანი ცომი გააბრტყელეთ 2-3 მმ სისქეზე და დააფინეთ პერგამენტის ქაღალდზე.

ფოტოზე ნაჩვენები მეთოდით დაალაგეთ თანმიმდევრულად - ვიჩინა, კარტოფილი, ყველი, ვიჩინა.

გადაახვიეთ და წაუვით კვერცხის გული;

დარჩენილი ნაწილი დაჭერით ფოტოს მიხედვით და გადაახვიეთ;

გაჭერით ორ ნაწილად და პერგამენტის ქაღალდიანად შედგით გამოსაცხობად;

შედგით აირღუმელში 150 გრადუსზე 20 წუთის განმავლობაში;

თვალი არ მოაცილოთ და მერე, გემრიელად მიირთვით.