აპრიორი სიკეთეების შესახებ, რომელი სიკეთეებიც უკვე გამოსცადეს სადღაც, დასავლეთსა თუ აღმოსავლეთში. თითქოს იქაური ცხოვრებაც განვლეთ, ახლა მხოლოდ მათი მოდელების გადმოტანაღა კმარა რომ ჩვენც ავეწყოთ და ვიყოთ ბედნიერები. სამყაროს სხვა მოდელების გადმოტანა, აქაური ისტორიის საფუძვლების გარეშე, ჰაერში გამოკიდებული სახლის მშენებლობას ჰგავს, მაგრამ ესეც არავის ადარდებს - მთავარია კომფორტი და კომფორტი (მცირე დრო, მეტი საქმე), მაგრამ ერთი ცნობილი ავტორი აგურებით აშენებულ საზოგადოებას ასე აფასებს და ძნელია მასზე უკეთ რაიმე თქვა. ისე გამოდის, თითქოს ნორმალურად მოწყობილ საზოგადოებაში დანაშაულთა ხსენებაც აღარ იქნება, რადგან უკმაყოფილების საბაბი მოისპობა და, მაშასადამე, ყველანი უცბად წმინდანები გახდებიან! ადამიანის ბუნებას კი არავითარ ყურადღებას არ აქცევენ, ბუნება განდევნილია, მას უარყოფენ! მათი აზრით, კაცობრიობა კი არ განვითარდება ბუნებრივი, ცოცხალი, ისტორიული გზით და ბოლოს მიაღწევს ნორმალურ საზოგადოებრივ წყობილებას, პირიქით, სოციალური სისტემა წარმოიშობა ანაზდეულად რომელიმე მათემატიკოსის თავიდან და მოაწყობს მთელ კაცობრიობას ისე, რომ ყველა უცოდველი და მართალი შეიქნება; ამისათვის არც ცოცხალი პროცესი და განვითარებაა საჭირო, არც ისტორიული გზა! ამიტომაა, რომ სისულელით ხსნიან ყველაფერს! ამიტომაც ცხოვრების ცოცხალი მიმდინარეობა არ უყვართ: სული ცხოველი არ არის საჭიროო! იმიტომ რომ ცოცხალი სული სიცოცხლეს მოითხოვს, ცოცხალი სული მექანიკას არ დაემორჩილება, ცოცხალი სული ეჭვს შეიტანს, ჩამორჩენილიაო! აქ კი, თუმცა უკვე მკვდრის სუნი უდის, შეიძლება იგი კაუჩუკიდანაც გაკეთდეს, - სამაგიეროდ, სიცოცხლე აღარ ექნება, ნებისყოფა არ ექნება, მონა იქნება, არ აჯანყდება! გამოდის, რომ ყველაფერი აგურის დაწყობასა და დერეფნებისა და ოთახების განლაგება-მოწყობაზე ყოფილა მხოლოდ დამოკიდებული! მაგრამ ადამიანის ბუნება რომ ჯერ კიდევ არ არის მზად, სიცოცხლე სწყურია, ჯერ სიცოცხლის პროცესი არ დაუმთავრებია, ადრეა სასაფლაოსაკენ მისი გასტუმრება! მარტო ლოგიკით ადამიანის ბუნების ძლევა შეუძლებელია! ლოგიკა, ვთქვათ, სამ შემთხვევას გაითვალისწინებს, მათი რიცხვი კი მილიონია! მთელი მილიონი შემთხვევის მოწყვეტა და ყველაფრის მარტო კომფორტის საკითხზე დაყვანა სისულელეა! რასაკვირველია, ამოცანის ყველაზე ადვილი გადაჭრაა! აქ ყველაფერი აშკარაა, ფიქრიც არ უნდა! უმთავრესი კი ის არის, რომ ფიქრი არ უნდა! სიცოცხლის მთელი საიდუმლო ორ ფურცელზე დაეტევა!