ჩვენი ანუ მოსახლეობის გადახდილი გადასახადების უდიდესი ნაწილი ჩვენზე ანუ მოსახლეობაზე მზრუნველ ადმინისტრაციულ რესურსზე რომ იხარჯება, ეს ვიცით და მივეჩვიეთ (რა პრობლემაა, სადაც 10 კაცი აკეთებს 5 კაცის საქმეს, ბარემ 40-მა გააკეთოს - ეს ხომ 40 ხმაა არჩევნებზე + მათი ოჯახების ხმებიც). ამის პარალელურად, ჩვენი ანუ მოსახლეობის ფული იხარჯება სხვადასხვა პროექტებზე - იქნება ეს ტროტუარების კეთილმოწყობა, გარე განათებების და ღობეების განახლება, სკვერების რეაბილიტაცია და ა.შ. (ფულია ასათვისებელი და ხალხი მოსამადლიერებელი - არჩევნების წელია). თან „რაც უმფრო კარგს გააკეთებენ... და მოსაწონს“, მით უკეთესი. ამას გარდა, მე მაქვს კიდევ ერთი იდეა რაში შეიძლება დაიხარჯოს ჩვენი ანუ მოსახლეობის ფული, ისე რომ მოსახლეობა კიდევ უფრო მადლიერი იყოს (ამჯერად ავტობუსებზე არ ვსაუბრობ. ცხადია, ეს ერთ-ერთი მოწინავე პრობლემა მგონია, მაგრამ მხოლოდ ეს ხომ არ არის?! თან მაინც არ დანიშნავენ და...). ცოტა კი მიკვირს, შოშია გოგოლაძის ქვეყანაში, სადაც ყველაფერი „შვილებისათვის“ კეთდება, აქამდე როგორ ვერ მოიფიქრეს, მით უფრო, რომ ზემოთნახსენებ სკვერებში, ყველაზე მეტად, ბავშვებს, სწორედ დეკორატიულ აუზებში ჭყუმპალაობა მოსწონთ. ჰოდა, დამებადა იდეა.

      რამდენი უბანია ნეტავ მცხეთაში? თითოეულ უბანში ერთი ან ორი აუზი რომ დავდგათ რამდენ ბავშვს გავახარებთ? (დავდგათ, იმიტომ დავწერე, რომ ის ფული, ჩვენი ანუ მოსახლეობის ჯიბიდან უნდა აიღონ). განსაკუთრებით იმ უბნებში, რომლებიც საერთოდ ვერ გრძნობენ მცხეთის ნაწილად ყოფნას - მაგალითად ჩემს უბანში (აზნევ(ფ)თი - სახელი მაინც შეუცვალეთ), მაგალითად, სადგურის უბანში - მეცამეტე რაიონს რომ ჰგავს ცნობილი ფილმის მსგავსად, არმაზში, ნარეკვავზე და ა.შ.

      აბა რას იტყვით? იდეა ისეთია ბავშვებს რომ გაახარებს, შესაბამისად ბავშვის მშობლებსაც, ცოტა ფულიც დაიხარჯება (გატყდება) და ყველა ბედნიერი იქნება (ეს ცოტა დაახლოებით 12-14 ათასი ლარია. 20-25 კარკასული აუზი, თავისი სრული კომპლექტაციით, ფილტრებით, ტენტებით და ა.შ. P.S. მომავალ წელსაც გამოიყენებთ).