დღეს 27 იანვარია... მართლმადიდებელთათვის ერთ-ერთი გამორჩეული დღესასწაული - წმინდა ნინოს ხსენების დღე... არამართლმადიდებელთათვის იანვრის ერთ-ერთი ბოლო დღე, ყველა ადამიანისათვის სამშაბათი, ზოგისთვის დატვირთული, ზოგისთვის უდარდელი, ზოგისთვის გამორჩეული, ზოგისთვის კი ერთი ჩვეულებრივი დღე "სხვათა ათასთა მრავალთა მსგავსი".

რა მნიშვნელობა აქვს რა დღეა?! რა თვეა?! რა რიცხვია?! მნიშვნელოვანი ის არის როგორ გადის ასობით, ათასობით და ათიათასობით დღე თითოეული ჩვენთაგანის ცხოვრებაში... ზოგჯერ უიმედოდ, ზოგჯერ უსაქმურად, ზოგჯერ უსიხარულოდ, ზოგჯერ... ზოგჯერ... ზოგჯერ...

გუშინ საღამოს, სახეზე ბედნიერი ღიმილით, ხელში ენძელებ-იებით დამშვენებული მივუყვებოდი რუსთაველის გამზირს და თავისუფლების მეტროსთან მისულს თავი უკვე შეურაცხადი მეგონა. მკითხავთ რატომ? ათასიდან არცერთი ადამიანი არ შემხვედრია, რომელიც ღიმილით გამივლიდა გვერდს და ჩემი განწყობა გადაედებოდა, სამაგიეროდ მოახერხეს და მე გადმომდეს საკუთარი კოზები, ბრაზი, ცინიზმი, ირონია, სიბრალულის მზერა... დაჭკნა იებიც, ენძელებიც, ისევ იანვარი დადგა და ისევ ყინვამ გამიყინა უხელთათმანოდ დარჩენილი თითები...

მთელი დღეა ვფიქრობ, რითი გავუხალისო "ერთადერთი წუთი სოფელში" მათ, ვისაც ამაზე არ უფიქრია, ვინც არ უფრთხილდება ლამაზ თვალებს და დარდისთვის იმეტებს, ვინც არ ეწინააღმდეგება ბრაზს და ლამაზ ღიმილს ჩვენთვის აღარ იმეტებს, ვინც ნებას აძლევს ზამთრის ყინვას და გულს გაციების ნებას აძლევს...

ჩვენ ყველას გვყავს მეგობრები, მშობლები, დები და ძმები, ბევრი ახლობლები, უფრო მეტი ნაცნობები... ყველანი ერთად კი ჩვენ ყველაზე ბევრნი ვართ. ამდენი იმიტომ ვიბოდიალე, რომ ბოლოს ყველას ერთი რამ მინდა გთხოვოთ... მოდით ყველამ ერთად გავულამაზოთ სულ რაღაც ერთი თვის თავზე კარს მომდგარი გაზაფხული ჩვენთვის საყვარელ ადამიანებს და ერთი კონა ენძელებით, იებით თუ ყოჩივარდებით გავამეტებინოთ ჩვენთვის ასე გაძნელებული, გაღიმება, კეთილი მზერა, სითბო და სიყვარული...

ყველა ჩვენგანი მთელი დღის განმავლობაში უამრავ ადამიანს ხვდება... ყოველ დილით წავიღოთ სახლიდან "ღიმილების - smile" სტიკერები და ვაჩუქოთ ნებისმიერ მათგანს... ანდაც დავწეროთ პატარა ფურჩლებზე ბევრი თბილი სიტყვა და ყოველი დილა ამ სითბოთი ავუვსოთ სხვებსაც და საკუთარ თავებსაც.

ჩემო თბილებო, ტკბილებო, ყველაზე ლამაზებო, ჭკვიანებო, დიდებო და პატარებო, მდიდრებო და ღარიბებო, საქმიანებო და უმუშევრებო, სტდენტებო და პენსიონრებო... ამ თაიგულით გილოცავთ ყველას ნინოობას, უბრალოდ 27 იანვარს, კიდევ ერთ სამშაბათს და გისურვებთ თქვენი ცხოვრების ყველა დღე მხოლოდ სიკეთით, სითბოთი და სიყვარულით იყოს სავსე...

"მე თქვენს მეტი არავინ მყავს ამ ცოდვიან მიწაზე"