ჩემს ქუჩაზე ცხოვრობს ერთი ძალიან საყვარელი მოხუცი ბაბუა, რომელიც ყოველ დილით თავის შვილიშვილ გოგონას სკოლაში აცილებს ხოლმე. დღეს დილითაც (როგორც თითქმის ყოველ დილით) მათთან ერთად მომიხდა ქუჩის რაღაც ნაწილის გავლა და მათ მორიგ ძალიან საინტერესო საუბარსაც შევესწარი უნებლიედ:

     შვილიშვილი (პატარა გოგონა, შავი, გრძრელი ჩაწნული თმით და ეშმაკუნა შავი თვალებით) ეკითხება ბაბუამისს:

- ბაბუ შენ რომ უნივერსიტეტში ჩააბარე ბევრი გამოცდა გქონდა?
- აბა არ მქონდა ბაბუ? ყველაფერში გამოცდა გვქონდა მაშინ, ახლა რომაა ასე კი არ იყო... ბევრს ვმეცადინეობდით, კარგად ვსწავლობდით და კარგადაც ჩავაბარეთ ტეხნიკუმის გამოცდები. შენ რომ გაიზრდები შენც უნდა ჩააბარო აბაა...
- რაში უნდა ჩავაბარო ბაბუ?
- ყველაფერში უნდა ჩააბარო...
- და როგორ უნდა ჩავაბარო?
- როგორ და იქ რომ მიხვალ კომისიასთან, დადგები და ისინი გკითხავენ ყველაფერს და გაიგებენ რა იციიი...რა არ იცი... კარგად გისწავლია სკოლაში...გიზარმაციაააა...
- მაგას როგორ გაიგებენ?
- როგორ და გკითხავენ ყველაფერს კაცო! (გაბრაზდა, აშკარად დაიღალა ამდენი შეკითხვით), გეტყვიან... აბა, ელენე... როგორ სწავლობდი სკოლაში, როგორ წერდი, როგორ კითხულობდი, მასწავლებლებს ხომ არ აბრაზებდი...სკოლას ხომ არ აცდენდი... გკითხავენ ასე და გაიგებენ.
- თუ მკითხავენ მე ვეტყვი კარგად ვსწავლობდიო, ზოგჯერ ვზარმაცობდიო... მაგრამ კარგად ვკითხოლობ და ვწერ და ამას რომ ვეტყვი მიმიღებენ ხომ ბაბუ უნივერსიტეტში?
- მაგას თუ ეტყვი მიგიღებენ აბა რას იზამენ, მაგრამ ზოგჯერ რომ ზარმაცობ ეგ არ მოეწონებათ. აწი თუ აღარ იზარმაცებ უფრო ადვილად მიგიღებენ. გაიგე შეენ?

     ბავშვი დაფიქრდა და ეუბნება:

- ბაბუ იცი რა მოვიფიქრე? ზოგჯერ ვიზარმაცებ მაგრამ იქ რომ მივალ არ ვიტყვი ვზარმაცობდიო, კარგად დავწერ, კარგად წავიკითხავ, იებზე ლექსსაც ვიტყვი და ჩავაბარებ...

.....................

მართალია საუბრის დასასრული ვერ მოვისმინე მაგრამ ეროვნული გამოცდების სახეცვლილი ვერსიის საფუძველის ჩაყრას ნამდვილად დავესწარი. მთავარია კარგად წერდეთ, კითხულობდეთ, ლექსები იცოდეთ, მასწავლებელს არ აბრაზებდეთ და 2025 წელს ერთიანი ეროვნული გამოცდა ჩაბარებული გაქვთ!!!