ვეცადე სათაური დამემსგავსებინა ყვითელი პრესის გარეკანზე განთავსებულ სათაურს, რადგან ვხვდები, რომ ჩვენს ქვეყანაში კიდევ დიდი ხნის განმავლობაშ იქნება მომგებიანი, როცა მკითხველს არათუ აცნობ სიახლეს, არამედ ჯერ კითხვას უსვამ.

ახლა რაშია საქმე, როგორც ერთი ჯერარდაარსებული, მაგრამ უკვე პრესტიჟული ჟურნალი "მიზოგინია Times" იტყობინება, მალე საქართველოში ჯარში ქალების გაწვევა სავალდებულო გახდება. ეს კანონპროექტი ითვალისწინებს 20 დან 35 წლამდე კდემამოსილ, მანდილმოსილ, პირსინგმოსილ თუ ნებისმიერ სხვარამმოსილ ქალბატონების ჯარში გაწვევას, მთავარია როგორმე დადგინდეს რომ მათი სქესი ნამდვილად არის Female (მდედრობითი).

შესაძლოა ერთობ იუმორისტული და დეზინფორმაციული პოსტი მოგეჩვენოთ, მაგრამ როდესაც არგუმენტებს ჩამოვთვლი თუ რატომ უნდა დაუჭიროთ ამ კანონპროექტს მხარი, ეგებ მართლაც დაფიქრდეს უცნაურ შენობას შეფარებული დეპუტატთა კოლექტივი და რომელიმემ პარლამენტის სხდომაზეც გაიტანოს ჩემი შეთავაზება.

რატომ ქალები ჯარში?

• ჯარგამოვლილი ქალების დაჩაგვრა ქართველ "მამაკაცებს" გაუჭირდებათ, რადგან ერთს ისეთ უთაქებენ მეორე აღარ დასჭირდეთ. (მოგეხსენებათ ქალები უფრო შრომისმოყვარეები და "ამტანები" არიან, შესაბამისად მათი მომზადების დონე და "მუსკულებიც" უფრო მაღალი იქნება)
• ჯარგამოვლილი ქალი გაცილებით შრომისმოყვარე, გამბედავი, მიზანდასახული და წარმატებული იქნება, ვიდრე ჯარგარეთ დარჩენილი ქალი.
• ქალებსაც ექნებათ შესაძლებლობა "ვაინი ბილეთი" აიღონ და ესოდენ მომრავლებულ დაცვის სამსახურთაგან რომელიმეში იმუშაონ.
• საბოლოოდ აღდგება გენდერული თანასწორობა და ქალი აღარ იქნება არც სუსტი სქესის წარმოამდგენელი, არც უნივერსიტეტში შესატან საბუთთა სიაში დააკლებენ ზემოხსენებულ "ვაინი ბილეთს" ან მასთან გათანაბრებულ საბუთს (სააღრიცხვოსაც მოსთხოვენ) და მასაც ექნება საშუალება ითხოვოს "ფორმა 26".
• ამიერიდან ქალებსაც ეცოდინებათ იარაღის დაშლა-აწყობა!
• ამიერიდან სუფრასთან ქალებიც მოიგონებენ ჯარის ამბების, ეყოლებათ ჯარის დაქალები, გაჩნდება ახალი მეტსახელები და სახლში ექნებათ ჯარიდან წამოღებული "ხებე".
• ...

საგულისხმოა ის ფაქტიც, რომ აღნიშნულ კანონპროექტში არის მნიშვნელოვანი პუნქტი, რომელიც ქალს ათავისუფლებს ჯარისგან.

20-35 წლამდე ნებისმიერ ქალბატონს სახელმწიფოს წინაშე ჰმართებს, მოიხადოს მასზედ დაკისრებული სამხედრო ვალდებულებები, გარდა იმ შემთხვევებისა, როცა ქალბატონებს სახლში ჰყავთ 12 წლამდე ასაკის შვილი. დიახ ქალბატონებო, თუ თქვენ სახლში გყავთ 12 წლამდე ასაკის ადამიანი (საკუთარი შვილი, ნაშვილები ან ნებისმიერი) რომელზეც მეურვეობა გეკისრებათ, თქვენ ჯარისგან თავისუფალი ხართ.

ვფიქრობთ ეს დამატება ქვეყანაში დემოგრაფიულ მდგომარეობასაც გააუმჯობესებს და ცოტა სოციალურსაც, რადგან ჯარის შიშით ქალბატონები შვილებს გააჩენენ, ან ბავშვთა სახლებიდან აიყვანენ - ქვეყანას ორივე აწყობს.

დიდი სიამოვნებით მივიღებ დამატებით შემოთავაზებებს კანონპროექტში ცვლილებების შეტანასთან დაკავშირებით, ასევე შეგიძლიათ ჩემ მიერ ჩამოთვლილ არგუმენტებს შეჰმატოთ, ან კონტრარგუმენტები მომახსენოთ კომენტარებში.

• წინა კანონპროექტი თბილისის მერიისთვის - დაიბანე, თორემ დაგბანთ!