ვიდეო რგოლი - ვირუსი ყინოლოვანი წყლით სახელდახელოდ დამზადებულ-დაჭრილ-დამონტაჟებულია, (ისედაც მოსაწვევში დანიშნულ ვადას გადავაცილე რამდენიმე დღით), ამიტომ შესაძლოა ტექსტი კარგად არ ისმოდეს და მინდა ვიდეოს ტრანსკრიპტი შემოგთავაზოთ.

"როგორც წესი ვიდეო მიმართვების ჩაწერა და გავრცელება არ მჩვევია, მაგრამ ახლა სხვა გზა არ მაქვს.

დღეს 2014 წლის 23 აგვისტოა, დღის 3 საათი. მთელი მსოფლიო საშინელმა ვირუსმა მოიცვა. სამედიცინო სივრცეში მას ყსგ (IBC) ვირუსს უწოდებენ, ესაა აბრევიატურა სიტყვებისა - ყინულოვანი სათლის გამოწვევა (Ice Bucket Challenge). ვირუსი ვრცელდება ყველა კონტინენტზე ასაკის, სქესის, კანის ფერის, ეთნიკური წარმომავლობისა თუ რელიგიური მრწამსის მიუხედავად.

ვირუსის ასეთი მასშტაბური გავრცელების მიზეზი გახლავთ ის ფაქტი, რომ ყსგ ვირუსი შენიღბულია ქველმომქედების სახელით. ამასთანავე, ამ ვირუსით დაინფიცირებული ადამიანების ჯანმრთელობას და სიცოცხლეს საფრთხე არ ემუქრება, გარდა იმ შემთხვევებისა, როცა საქმე გვაქვს განსაკუთრებულ აბდლობასთან! ვირუსი მხოლოდ ჩვენს გონებას და ქცევას აკონტროლებს.

ვირუსი ვლინდება სამ მოქმედებაში:

1. საქველმოქმედო ფონდებში ფულის გადარიცხვა;
2. თავზე ცივი და ყინულიანი წყლის გადასხმა;
3. მოწვევა და დაინფიცირება მეგობრებისა.

როგორც შხირად ხდება ხოლმე, საქართველოში ამ ვირუსმაც მუტაცია განიცადა და  მისი ერთადერთი დადებით ქცევა - საქველმოქმედო ფონდებში ფულის გადარიცხვა, მოსახლეობის უმრავლესობას ვერ მოედო. ხოლო ვინც თანხა გადარიცხეთ, ღმერთმა ყველას ასწილად მოგაგოთ!

ვირუსისგან თავის დაცვა შეუძლებელია, ადრე თუ გვიან ის თქვენამდეც მოაღწევს. ვირუსმა ჩემი მეგობრები დააინფიცირა და მათი გამოისობით, ახლა მეც ინფიცირებული ვარ.

მეგობრებო, ვირუსი მოქმედებას იწყებს, მეგობრებო გიგზავნით მოსაწვევს, გიგზავნით ვირუსს დასაინფიცირებლად, ვაგზავნი ყველასთან ვინც ამ ვიდეოს ნახავს. მართალია ვაგზავნი ვირუსს, მაგრამ მე მისი ქცევის კოდი შევცვალე.

ამიტომ ნუ იტყვით უარს ჩემს მიერ გამოგზავნილ ვირუსზე. ვირუსს ვერ დაამარცხებ, მაგრამ შენ შეგიძლია შეცვალო ის!"

იხილეთ ვიდეო!

ვიდეოს ჩაწერისას დახმარებისთვის დიდი მადლობა თამარ გელიშვილს და მის ნაქებ ოპერატორ ქეთა ელიაშვილს!