ერთი კითხვა მაწუხებს მთელი დღეა. არ ვიცი, აქამდე არ მიფიქრია, რატომ არის დაბადების დღე დღესასწაულთან დაკავშირებული? რატომ ვზეიმობთ ან გვიხარია ჩვენი დაბადების დღე? სანამ პატარა ხარ საჩუქრები გახარებს შესაძლოა, ტორტი და ა.შ. მოკლედ, ირგვლივ სამყაროს ვერ ამჩნევ, მაგრამ რეალურად იბადები ამ ქვეყნად ტანჯვისთვის, ტკივილისთვის, ბრძოლისთვის, თავის შენახვისა და გატანისთვის.

      ასეც თუ ისეც, მაინც გვიხარია დაბადების დღე, ზოგჯერ საკუთარზე მეტად, საყვარელი ადამიანების დაბადების დღე გვიხარია, ალბათ სიცოცხლეში შემობიჯებას უნდა ვზეიმობდეთ და იქნებ მართლაც ეს განწყობაა.

      ერთხელ უკვე ვთქვი, რომ განგებამ მარადიული ერთობისთვის შეაკავშირა სიცოცხლე და ინდი. დღეს მას 23 წელი შეუსრულდა. არ ვიტყვი წარსულით, არ ვიტყვი, რადგან ვფიქრობ სწორედ ახლა შეაბიჯა იმ სიცოცხლეში სადაც სიხარულია, ბედნიერება, სიყვარული, სადაც არავინ არავის ერჩის, არავინ კვდება. ხშირად გაჩნდა დღეს ჩემს წინ მისი კაშკაშა თვალები, როგორ ხარობს და როგორ ახარებს გარშემომყოფებს. იცით, დღემდე როდესაც მისი ფოტოებს ვათვალიერებ, კვლავ იმ განწყობას მიტოვებს, კვლავ შეუძლია გაგამხიარულოს, გაგაბედნიეროს და გითხრას რომ ლაშა, სისულელე დაწერე როცა თქვი ამ ქვეყნად ტანჯვისთვის, ტკივილისთვის, ბრძოლისთვის ვიბადებითო, არა სიხარულისთვის ვიბადებით და თუ არ გჯერა, აგერ მიყურეო...

      დაბადების დღეს განსაკუთრებული სიმღერა უხდება, განსაკუთრებული...

      ჰოდა, დღევანდელ დაბადების დღესაც განსაკუთრებული სიმღერა (გალობა) მიეძღვნა, ისეთი რომლის მიძღვნასაც არასოდეს, არასოდეს გავივლებდი გულში.

საუკუნოდ იყავ ხსენეებააა, ააა მიიი სიიი ♪♫

საუკუნოდ იყავ ხსენეებააა, ააა მიიი სიიი ♪♫

სულმან მისმან კეთილთა შინა განისვენოს და ნათესავმან მისმან დაიმკვიდროს ქვეყანა!

ეს ფოტოც დღეს აღმოვაჩინე. მარტვილშია გადაღებული 2014 წელს. კანიონზე ის მართავდა მეგობრების ნავს და ზოგადად ცხოვრებაშიც - იჯდა ნავში და მეგობრებს ასე დაატარებდა ხოლმე ბედნიერების ნავით!