დეკემბერი თბილად დაიწყო. წინა დღეების ყინვა, ღამის სითბომ შეცვალა და ღრუბლებიც თოვლის ნაცვლად წვიმას გვიგზავნიან. ნაცრისფერია ზეცა და ამინდი, მაგრამ ჯერ კიდევ წითელ-ყვითელ-ყავისფერია მიწა და გარემო. შემოდგომა არ დაზავებია ზამთარს და არც საქორწილო კონტრაქტი გაუფორმებია - უბრალოდ თავის სიცოცხლეს იცავს. მოკლედ დღეს თბილა და ფანჯრების გაღება გადავწყვიტე. ხეზე წერილი დამხვდა. აღარ მეგონა, თუ კიდევ ვინმე იყენებდა საფოსტო მტრედებს ან თუ იყენებდა, ასე ცუდად აღზრდილი მტრედი სად იშოვა, რომ არა სახლში, არამედ ხის კენწეროზე დატოვა წერილი. იქიდან მოზიდვას, დიდი წვალება დასჭირდა, მაგრამ როგორც ადრე დავწერე - ფოსტით მოსულ წერილებში არის რომანტიკა და მისი წაკითხვაც ერთგვარი სიამოვნებაა.

"გამარჯობა,
      ახლა უკვე სახლიდან გაუსვლელად, ჩვენი საფოსტო მტრედის საშუალებით, თქვენ შეგიძლიათ აიღოთ საჯამაგირო ვალი".

"გამარჯობა,
      სპეციალურად თქვენთვის, ქრისტეშობისთვის პირველ, ორ და სამ რიცხვებში, გრანდიოზული ფასდაკლება ჩვენთან. გამოატანეთ მტრედს წერილი სიტყვით - მნებავს, და მიიღეთ სპეციალური ფასდაკლების ულვაში".

"გამარჯობა,
      ილაღობე ჩვენთან ერთად ყოველდღე და მოიგე უდიდესი საჭურჭლე. თვის ბოლოს, მეჭურჭლეთუხუცესი გამოავლენს ყველაზე კარგ მოლაღობეს".