ფილმებზე წერა მივატოვე ლოგიკური მიზეზის გამო - ფილმებს აღარ ვყურებდი და საწერიც გამომელია. გასულ weekend-ებზე ცოტა დრო გამომიჩნდა და დიდი ორჭოფობის მიუხედვად მაინც ვნახე ერთ-ერთი უახლესი ფილმი "ამაღლება" (Risen).

      ფილმის რეჟისორია კევინ რეინოლდსი. ჟანრი კი ისტორიულ-მისტიური დრამა შეურჩიეს. იშვიათად, თითქმის არასოდეს ვუყურებ ქრისტეზე გადაღებულ ფილმებს, განსაკუთრებით ბოლო პერიოდში გადაღებულს, მაგრამ ამჯერად კრიტიკოსთა მინაწერები წავიკითხე, როჯერ ებერტის რეიტინგიც ვნახე და ვიფიქრე, იქნებ რამე კარგი გადაიღესთქო. ჩავრთე და საბოლოოდ მაინც ვინანე.

      დაიწყო ფილმი ბარაბას აჯანყებით, რომელიც როგორც ფილმიდან ირკვევა, პასექის წინა დღეებში ხდებოდა. აჯანყებას ჩაახშობს თუ არა ტრიბუნი კლავიუსი (მთავარი გმირი ფილმისა. მსახიობი ჯოზეფ ფიენესი), ბრუნდება იერუსალიმში, მიდის პილატესთან, რომლისგანაც ახალ დავალებას იღებს - ნაზარეველი ჯვარზე გავაკარი და მიხედე მაგ ამბავსო. იქვე აბარებს - ძვლები არ გადაუმტვრიო - დაინდეო. პირველი გაკვირვება აქედან - პილატეს გულისხმიერება და იუდეველების აჯანყება პასექის სადღესასწაულო დღეებში? რაღაც არ მახსენდება და მაკვირვებს კიდეც.

      არ ვიცი აქცენტი სპეციალურად გააკეთეს თუ მე გავამახვილე ყურადღება ამ კადრზე - მაცხოვრის სამსჭვალების რაოდენობა 4 იყო. ფილმის მოყოლა რომ არ გამომივიდეს, არ გავაგრძელებ იმ ამბავს, რაც ფილმში ხდება. უბრალოდ გეტყვით, რომ ესაა ისტორია ტრიბუნისა, რომელმაც ქრისტე იხილა აღმდგარი და რომელიც დაესწრო ქრისტეს ამაღლებას. მეტიც, გალილეისკენ მოციქულებიც გააცილა და რომაელებისგანაც გადაარჩინა (ამაღლების სცენას რაც შეეხება, მაინცდამაინც სახარებისეული არ იყო).

      სხვა მხრივ, რეჟისორი და სცენრისტები, როგორც ჩანს ცდილობდნენ, არ გადაეხვიათ მახარებელთა მონათხრობისთვის.

      ფილმი მორჩა და სრული უგრძნობლობა, სრული სიცარიელე და უბრალო შეკითხვა - რისთვის გადაიღეს?

      ქრისტეზე გადაღებულ ფილმებს შორის, მგონი, ყველაზე რეიტინგული და პოპულარული ჯერ "იესო ქრისტე სუპერვარსკვლავი" იყო და ბოლო პერიოდში "ქრისტეს ვნებანი". ამ ორი ფილმიდან, არცერთს არ აქვს პრეტენზია, ქრისტიანობის მქადაგებლის როლი მოირგოს, ალბათ ამიტომაც გამოუვიდათ რეჟისორებს მეტნაკლებად საინტერესო. და ფილმი კლასიკა, "ბენ ჰური (1959)", რომელიც ასევე ქრისტეს პერიოდში განვითარებულ მოვლენებს ასახავს და ქრისტეზე გადაღებულ ფილმებს შორის უკონკურენტო ლიდერია.

      ჰოდა, ასეთ დროს, გაკვირვება მიპყრობს და კითხვა მიჩნდება - რისთვის გადაიღეს "ამაღლება" და საერთოდ, რისთვის იღებენ მსგავს ფილმებს? შემოსავალიც კი აღარ მოაქვთ მათ. ამას ისევ, ნოდარ მანაგაძის გადაღებული ამაღლება ჯობდა.