გთხოვთ წამოდგეთ რიგითო ეშმაკუნებო, თავადი ბელზებული მობრძანდება.

     პატარა ეშმაკუნები კუდის ქანქარითა და რქების ჭახა-ჭუხით წამოიშალნენ და აჟიოტაჟით მიეგებნენ მთავარს, რომელიც მეტისმეტი მედიდურობით მოიკლაკნებოდა და მოიმანჭებოდა.

- სხდომას გახსნილად ვაცხადებ - წამოიწყო ვასილისკომ - პირველი მომხსენებელი იქნება "დაყავი და იბატონეს" სატანა. გთხოვთ მთავარ ბელზებულს წარუდგინოთ რა ხდება ადამიანთა შორის, რა ამბებია?

- ახლავე მოგახსენებთ ბატონო - სიამაყითა და მეტისმეტი ქვეშ-ქვეშობით დაიწყო - უნდა გითხრათ რომ ქრისტეს ნამდვილი მიმდევრები იშვიათობაა და საქმე უფრო და უფრო მიმარტივდება, ისე არიან დათითოკაცებულნი, როგორც აქამდე არასდროს. რაც, ვფიქრობ ჩვენი გამარჯვებაა!

- ბრიყვო! - დაიღრიალა ბელზებულმა - რას ამბობ? ჩვენი გამარჯვება? ეს სიტყვები ხომ სწორედ კაცთაგან სმენია როცა დამარცხების სუნი ასდის მათ სულებს? ეგეც არ იყოს, შენი ნახარები "დათითოკაცების" ამბავი ვერ გადავწყვიტე კარგია თუ ცუდი?!

- რას აბობთ, განა სულ იმას არ ვცდილობდით მათი ერთობა მოგვესპო? ახლა რაშია საქმე?

- საქმე იმაშია, რომ როდესაც ერთად არიან, თავი დაცულები და ყველაზე ძლიერები ჰგონიათ, ღმრთისაგან გამორჩეულობა ისე ავსებს და აღმაღლებს მათ ბუნებას, ისე აღტკინებულები არიან საკუთარი პატივმოყვარეობით, რომ ჩემი კერძი ხდებიან - პატივმოყვარეობა ხომ ჩემი საყვარელი ცოდვაა.

- მაშ, ჯობს ერთობით ილოცონ?

- ვაი თუ მათი ლოცვა ზეციურ საუფლოს მიწვდეს? იქნებ მართლაც ჭეშმარიტი ქრისტიანები არიან? ერთობა დიდი ძალაა!

- მაშ დავყოთ, როგორც აქამდე ვაკეთებდი და რისი ხარებაც დღეს თქვენთვის მეწადა დიდო თავადო.

- დავყოთ! მაგრამ დაყოფისას, დათითოკაცებული ქრისტიანები, უარყოფილნი ყველასაგან - ოჯახისგან, მეგობრებისგან, ზოგჯერ ეკლესიიდანაც კი, თუკი სასოწარკვეთილებას არ მიეცემიან (დარბაზში სასოწარკვეთილების სატანამ ნიშნის მოგებით გადაიხარხარა), მაშინ მათი ერთადერთი გზა ქრისტეს სასოება და მისდამი მორჩილებაა, მორჩილება კი ყველაზე ძლიერი იარაღია ჩვენს გასანადგურებლად.

- მაშ, რა ვქნათ? გამოსავალი არ გვაქვს არც ჩვენ და არც მათ?

- მათი გამოსავალი როგორც ყოველთვის ქრისტეა, ზომიერება და თავმდაბლობა, ჩვენი კი ამ ზომიერების უზომოობაში გადაზრდა და თავმდაბლობიდან პატივმოყვარეობამდე აღტაცება!

"აბა, ქრისტეს ვერაფერს ვუხერხებთ და..." - სადღაც შორიდან სიტყვა ჩააკვეხა და ჩაიცინა ცინიკოსმა სატანამ.