მოგისმენიათ ალბათ, რომ სიყვარული იმ მეცნიერებას ჰგავს, რომელსაც შეუძლია კარგად აწონ-დაწონოს, დათვალოს, შეადაროს, შეაჯამოს, მთელ სამოცნიერო გამოცდილებაზე, სამეცნიერო შუქზე გახედოს, მაგრამ მაინც ვერასდროს შეძლებს გადაჭრით იწინასწარმეტყველოს შედეგები, უტყუარი, შეუმცდარი მოლოდინები. სწორედ ამიტომ არ არსებობს სიყვარულის მეცნიერება - ზუსტმეცნიერებათა შორის, მაგრამ დღეს მინდა სიყვარული ალკოჰოლს დავუკავშირო.

      სიყვარული თრობას ჰგავს. მას შეუძლია მოგიშუშოს იარები, ანდა მოგაყენოს უფრო დიდი ზიანი. მას შეუძლია გაგამხიაროლოს ან დაგაღონოს. მას შეუძლია შენს ცხოვრებაში დაუვიწყარი მომენტები შექმას - როგორც ტკბილმოსაგონარი, ასევე მწარედ გასახსენებელი.

      სიყვარული თრობას ჰგავს. მას მოაქვს ემოციები, საიდანღაც გამოწოვილი, ის ქმნის ბედნიერების მირაჟს ანდა უკვე არსებულ ბედნიერებას აფერმკრთალებს. მას მოაქვს ეჭვიანობა როცა საფუძველი არ არსებობს და მას მოაქვს იმედგაცრუება, როდესაც არაფერი არ არის დაკარგული. პირიქითაც შეიძლება, მას მოაქვს ბრმა ნდობა - როდესაც ყველაფერი გამქრალია და იმედი, რომელიც არ ასრულდება.

      სიყვარული თრობას ჰგავს. გაგრძნობინებს თავს ყველა დროის ყველაზე კარგ ადამიანად, საუკეთესო პიროვნებად, მაგრამ გამოფხიზლების შემდეგ გიწევს საფასური გადაიხადო.

      სიყვარული თრობას ჰგავს. ის ჩვენს ახალგაზრდობას ისე გაიტაცებს და გააბრუებს, რომ დარწმუნებული ხარ ესაა ერთადერთი, ნამდვილი, რეალური სამყარო.

      სიყვარული თრობას ჰგავს. ის ახერხებს გაგხადოს მასზე დამოკიდებული, მთელი შენი ცხოვრება მიისაკუთროს, მოშალოს შენი ურთიერთობები მეგობრებთან, ახლობლებთან, თანამშრომლებთან. მაგრამ ყველაფერ ამის მიღმა ყოველთვის იარსებებს ის - რაც შენ გაგამართლებს - საკუთარი გონება.

      სიყვარული თრობას ჰგავს. საჭიროა ზომიერება, რომელიც იკარგება. ზომიერება რადგან თქვენ იგრძნოთ ის და არა მან გიგრძნოთ თქვენ. ზომიერება რადგან არ დაკარგოთ თავი მასში და არ დაგისაკუთროთ მან მთლიანად. ზომიერებით სიამოვნებას შეინარჩუნებთ.

      სიყვარული თრობას ჰგავს. ამ დროს იმაზე ჯანმრთელი ხარ, ვიდრე ბევრი სხვა და იმაზე ავადმყოფი, ვიდრე ჯანმრთელნი არიან.

      სიყვარული თრობას ჰგავს. თუ უარით გაგისტუმრებენ საშინლად მოწყენილი იქნებით.

      სიყვარული თრობას ჰგავს. რამდენიმე წამში შეიძლება მარადისობა იგრძნოთ, შემდეგ კი მთელი კვირა გავიდეს და იყოს დაცლილი ყველაფრისგან, რაც გიგრძვნიათ, რაც გაბედნიერებთ.

      და მაინც სიყვარული თრობას ჰგავს. ნაბახუსევზე გეღვიძება და ისევ ალკოჰოლით ცდილობ გამოძრომას.

      საბოლოოდ, მე მაინტერესებს, როგორ გგონიათ ამდენი მსგავსებიდან, რომელიმე მაინც არის სიყვარულზე?