აფრიკაში წასვლაზე ალბათ ცოტას თუ უოცნებია, მითუმეტეს ზიმბაბვეში... მაგრამ თუკი ერთხელ მაინც მოხვდებით იქ, იქაური დიასახლისები აუცილებლად გაგიმასპინძლდებიან ამ კერძით...

      Sadza სინამდვილეში ვახშამს ან ლანჩს ნიშნავს, ის ზიმბაბველების ერთ-ერთი ძირითადი კერძია, რომელსაც ხორცთან ან ბოსტნეულის ფოთლებთან ერთად ამზადებენ და თითქმის ყოველდღე მიირთმევენ. მისი მომზადება კი ყველა დამწყებმა თუ უკვე გამოცდილმა დიასახლისმა იცის...

      ამასთანავე ეს არის ერთ-ერთი პირველი საჭმელი, რომელსაც ჩვილი ბავშვები აგემოვნებენ ზიმბაბვეში.

      ერთი იტალიელი ფოტოგრაფის კვლევასაც თუ დავუჯერებთ sadza ზიმბაბველი ბებიების ფავორიტი კერძიც ყოფილა...

      Qwellynaria კი გთავაზობთ სწორედ ერთი ზიმბაბველი ბებიის საყვარელ რეცეპტს - Sadza (საძა) გოგრის ფოთლებთან ერთად.

შემადგენლობა:

Sadza (საძა):

1. წყალი - 4 ჭიქა
2. სიმინდის ფქვილი - 2-3 ჭიქა (რაოდენობა დამოკიდებულია საჭირო კონსისტენციაზე)

გოგრის ფოთლებისთვის:

1. გოგრის ფოთლები - ¼ კგ
2. არაქისის კარაქი - 2 ს/კ (25 მლ)
3. სანელებლები (უმჯობესია კერი - სამხრეთი აზიის სამზარეულოს სანელებლების ნაზავი)
4. მარილი - ½ ჩ/კ
5. პომიდორი - 1 საშუალო ზომის (დაჭრილი)
6. ხახვი - 1 ცალი პატარა ზომის (დაჭრილი)

მომზადება:

გოგრის ფოთლების მომზადება:

• ხელით კარგად გარეცხეთ გოგრის ფოთლები გამდინარე ცივ წყალში.
• ფოთლებს მოაცალეთ ძაფები და ყუნწები და დაჭერით ძალიან წვრილად.
• დაჭრილი გოგრის ფოთლები და ხახვი მოათავსეთ ემალირებულ ქვაბში და დადგით ნელ ცეცხლზე. არ დაასხათ წყალი, ფოთლები მომზადდება გარეცხვისას შერჩენილ წყალში. თუ აუცილებელი იქნება დაამატეთ ძალიან ცოტა წყალი.
• დააფარეთ სახურავი და გააჩერეთ 5 წუთი, სანამ არ დაიორთქლება.
• ადუღეთ სანამ ფოთლები არ დარბილდება, დაახლოებით 10 წუთი. შემდეგ დაამატეთ დაჭრილი პომიდორი, მოურიეთ და დატოვეთ კიდევ 5 წუთი
• შემდეგ დაამატეთ არაქისის კარაქი და მოურიეთ სანამ სრულიად არ გაიხსნება და მთლიანად არ შეერევა ბოსტნეულს.
• ადუღეთ კიდევ 5 წუთი, დროდადრო შეამოწმეთ, რომ არ მიიკროს ძირზე და არ დაიწვას.
• საბოოლოდ უნდა მიიღოთ სქელი მასა.

Sadza (საძა):

• აადუღეთ 3 ჭიქა წყალი
• ქვაბში მოათავსეთ ცოტაოდენი ფქვილი და დაამატეთ დარჩენილი 1 ჭიქა წყალი, მოურიეთ რომ კარგად გაიხსნას. შემდეგ დაამატეთ ადუღებული 3 ჭიქა წყალი.
• დადგით საშუალოზე მაღალ ცეცხლზე და ურიეთ ხის კოვზით სანამ ნარევი არ შესქელდება.

• როცა ადუღებას დაიწყებს, ყურადღება მიაქციეთ რომ არ დაიწვას
• რომ გასქელდება ცეცხლს დაუწიეთ, ქვაბს დააფარეთ სახურავი და დატოვეთ 15 წუთი. ძალიან არ უნდა ადუღდეს

• შემდეგ მოხადეთ სახურავი, ნელ-ნელა დაამატეთ დარჩენილი ფქვილი, თან ურიეთ და კოვზით დაშალეთ ფქვილის გროვები.
• შემდეგ დაახურეთ და დატოვეთ ძალიან დაბალ ცეცხლზე რამდენიმე წუთით.
• ბოლოს კი, მზა კერძს მოურიეთ სველი, ხის კოვზით.
• სუფრაზე მიიტანეთ მზა გოგრის ფოთლებთან ერთად

გემრიელად მიირთვით!