დისნეის საამქროდან, პიტ დოკტერის რეჟისორობით 2015 წელს გამოსული, მაღალრეიტინგული ანიმაცია Inside Out, ჩვენებურად, როგორც თარგმნეს, "თავდაყირა" ან "თავსატახი", იმ მულტფილმთა სათავეში დგას, რომელიც ბოლო ხანებში ვნახე და ვფიქრობ, 90_იანების ბავშვობის დროინდელი, გრაფიკით ჩართული ტელევიზორის ეკრანზე ნანახი ანიმაციური სერიალებისგან განსხვავდება იმით, რომ სულაც არ არის ბავშვური. მიუხედავად ანოტაციისა, სადავ ვკითხულობთ, რომ ანიმაციური ფილმი განკუთვნილია 6 წლის მოზარდებისთვის, არ მგონია 6 წლისამ შეძლოს და გაიაზროს, როგორ მოხდა რომ ერთი გოგონას (რაილის) გონებაში არის 5 სხვა გოგონა, რომლებიც რაღაცეებს აკეთებენ და ეს მოქმედებები შემდეგ რაილის მოქმედებებს უკავშირდება. მითუმეტეს რთული გასაგები იქნება, მათ მშობლებსაც რატომ ჰყავთ თავში ქალები და კაცები და სხვებსაც. რა ხდება ამ მულტფილმში ამის ასახსნელად, მინიმუმ უფროსია საჭირო.

      ფილმის მთავარი მესიჯია - ემოციები მართავენ ადამიანს. სიუჟეტს არ მოვყვები "სპოილერი" რომ არ გამომივიდეს, მითუმეტეს, რომ პოსტს სხვა იდეა აქვს. შეკითხვა მექნება ბლოგის ბოლოს და იქითკენ მინდა წავიყვანო საუბარი. მულტიფლმში გადმოცემულია გოგონას გონება, რომელშიც 5 ემოცია მართავს ყველაფერს: სიხარული, სევდა, შიში, მრისხანება და ზიზღი. ამ ხუთ ემოციას გადანაწილებული აქვს სხვა ემოციებიც და აკონტროლებენ ყოველივეს. რა თქმა უნდა, ახალშობილი იბადება სიხარულის ემოციით (მიუხედავად იმისა, რომ ყველა ახალშობილი ტირის, რეჟისორმა გადაწყვიტა, რომ პირველი ემოცია რომელსაც სამყაროსთვის უნდა შეეხება, ესაა სიხარული). და შემდეგ ეკრანზე ჩნდებიან სხვა ემოციებიც. ბავშვობაში სამართავ პულტთან სიხარული დგას, გარემოებებიდან გამომდინარე ენაცვლებიან ერთმანეთს ემოციები და ასაკის მატებასთან ერთად მმართველის ადგილს სევდა იკავებს და საბოლოოდ, დედამისის გონებიდან გამომდინარე, შეგვიძლია ვთქვათ, რომ ავტორის აზრით, ქალების მთავარი წარმმართველი, სევდის ემოციაა, მეტიც - სევდის ემოციაა მხსნელი.

      ფილმში საკმაოდ ორიგინალურად არის გადმოცემული ადამიანის ფსიქოლოგიის ის ძირითადი ნარატივები, რომლებიც შეეხება ქვეცნობიერს, არაცნობიერს, მეხსიერებას, სიზმრებს და სხვა ფროიდიანულ სამყაროს. აქვე არის ფიქრებისა და იდეების წყაროც, დავიწყების უფსკრული, ოცნებისა და წარმოსახვის პლანეტა, ღრუბლების ქალაქი და ა.შ.

      ერთი რაც ამ ფილმში არ არის და შეკითხვაც ფაქტობრივად ასე ჟღერს, ვინც ფილმი ნახეთ, ან ეს პოსტი წაიკითხეთ, როგორ გგონიათ, სად არის ამ გოგონას სული მოთავსებული? ან სად შეიძლება იყოს?